බොදුබල සේනා සංවිධානයේ ලේකම් පූජ්‍ය ගලගොඩ අත්තේ ඥානසාර භික්ෂුව අත්අඩංගුවට ගෙන අධිකරණයට ඉදිරිපත් කරන ලෙස දන්වා කොළඹ මහේස්ත්‍රාත් අධිකරණය වරෙන්තු නිකුත් කර තිබේ.

ඉස්ලාම් දහමට අපහාස කළේ යැයි ගොනුකර ඇති නඩුවක විත්තිකරුවකු ලෙස නම්කර සිටින බොදු බල සේනා සංවිධානයේ ලේකම් පූජ්‍ය ගලගොඩ අත්තේ ඥානසාර භික්ෂුව, එම නඩුව කැඳවූ අවස්ථාවේ අද අධිකරණයේ පෙනීනොසිටීම හේතුවෙන් මෙම නියෝගය නිකුත් කර ඇත.

මෙම නඩුවේ තීන්දුව අද දින ප්‍රකාශයට පත්කිරීමට නියමිතව තිබූ නමුත් නඩුව කැඳවූ අවස්ථාවේදී ඥානසාර භික්ෂුව අධිකරණයේ පෙනීනොසිටියේය.

තම සේවාදායකයා අසනීප තත්වයෙන් පසුවන නිසා අධිකරණයට පැමිණීමට නොහැකි වූ බව ඥානසාර භික්ෂුව වෙනුවෙන් පෙනීසිටි නීතිඥවරයා අධිකරණය කරුණු දක්වමින් කියාසිටි අතර, ඒ අනුව ඉදිරිපත් වූ කරුණු සලකා බැලූ කොළඹ අතිරේක මහේස්ත්‍රාත් පසන් අමරසේන මෙම නඩු තීන්දුව ප්‍රකාශ කිරීම ජනවාරි මස 09 වනදා තෙක් කල්තබනු ලැබිය.