සුබාස්කරන් අල්ලිරාජාට අයත් ටෙලිකොම් සමාගමක් වන ලයිකාමොබයිල් හි එක්සත් රාජධානියේ ශ්‍රම බලකායෙන් 90% කට ආසන්න ප්‍රමාණයකට තම රැකියා අහිමි විය හැකි බව ‘ද ගාඩියන්’ පුවත්පත වාර්තා කර තිබේ.

එම වාර්තාවට අනුව, මෙවර නත්තලට සමාගමේ පෙර කාර්ය මණ්ඩලයේ 300 කට වැඩි පිරිසක් ඔවුන්ගේ රැකියා පිළිබඳව බියෙන් පසුවෙති.

බ්‍රිතාන්‍ය-ශ්‍රී ලංකා ව්‍යාපාරික සුබාස්කරන් අල්ලිරාජාට අයත් සමාගම, විදේශයන්හි මෙන්ම එක්සත් රාජධානියේ සිටින අඩු වැටුප් සහිත කම්කරුවන් අතර ප්‍රචලිත ආයතනයකි.

පසුගිය සිකුරාදා, ලන්ඩන් නගරයේ ලයිකාමොබයිල් හි මූලස්ථානයේ කාර්ය මණ්ඩලයට පවසා ඇත්තේ, සමාගම “බරපතල අභියෝගවලට” මුහුණදෙන බවත්, රැකියා 316ක් දක්වා කපාහැරීමට සැලසුම් කරමින් සිටින බවත්, එක්සත් රාජධානියේ 48ක් වැනි සුළු පිරිසක් ඉතිරිවනු ඇති බවත්ය.

2022 දී ලයිකාමොබයිල් සමාගමට පවුම් මිලියන 24ක් අහිමි විය.

පසුගිය වසරේ, මුදල් විශුද්ධිකරණය සහ වැට් බදු වංචාවක් සම්බන්ධයෙන් පැරිස් අධිකරණයක් විසින් ලයිකාමොබයිල් සමූහයේ ප්‍රංශ ව්‍යාපාරයට යුරෝ මිලියන 10 (පවුම් මිලියන 8.3) දඩයක් නියම කරන ලදී.