ප්‍රජාතන්ත්‍රවාදී ආයතන ආරක්ෂා කිරීමට සහ ශක්තිමත් කිරීමට ප්‍රමුඛත්වය දෙන ලෙස රජයෙන් ඉල්ලා සිටිමින් හිටපු කථානායක සහ සමාජ සාධාරණත්වය සඳහා වූ ජාතික ව්‍යාපාරයේ වත්මන් අනුශාසක කරු ජයසූරිය ජනාධිපති අනුර කුමාර දිසානායක වෙත ලිපියක් යොමුකර තිබේ.

සිවිල් සමාජය සහ විපක්ෂය අතර එකමුතුකම සක්‍රීය සහ සියල්ලන් ඇතුළත් පාර්ලිමේන්තු ක්‍රමයක වැදගත්කම ජයසූරිය සිය ලිපියෙන් ජනතා විමුක්ති පෙරමුණ ප්‍රමුඛ ජාතික ජන බලවේගය වෙත අවධාරණය කළේය.

ශ්‍රී ලංකාවේ ප්‍රජාතන්ත්‍රවාදී සම්ප්‍රදායන් ඉස්මතු කරමින් ජයසූරිය ප්‍රකාශ කළේ අභියෝග හරහා වුවද, ප්‍රජාතන්ත්‍රවාදී මූලධර්ම පවත්වාගෙන යෑමේ ඉතිහාසයක් ශ්‍රී ලංකාවට ඇති බවයි.

අනාගත පරම්පරාව සඳහා ප්‍රජාතන්ත්‍රවාදය ශක්තිමත් කිරීම සඳහා මෙම උරුමය ගොඩනඟන ලෙස ඔහු රජයෙන් ඉල්ලා සිටියි.

රාජ්‍ය ව්‍යවසාය පිළිබඳ කාරක සභාව (COPE), රාජ්‍ය ගිණුම් පිළිබඳ කාරක සභාව(COPA ) සහ රාජ්‍ය මුදල් පිළිබඳ කාරක සභාව (COPF) වැනි අධීක්ෂණ කාරක සභා වෙනුවෙන් අටවැනි පාර්ලිමේන්තුවේදී (2015-2020) විපක්ෂයේ මන්ත්‍රීවරුන් විසින් ඉටු කරන ලද කාර්යභාරය පිළිබඳ ඔහු අවධානය යොමු කළේය.

විපක්ෂයේ මන්ත්‍රීවරයකු යහපාලනය කඩාකප්පල් නොකර කාර්යක්ෂමව එම රාජකාරිය ඉටු කරන්නේ කෙසේදැයි පෙන්වා දෙමින් එවක පාර්ලිමේන්තු මන්ත්‍රී සහ වත්මන් ඇමැති සුනිල් හඳුන්නෙත්ති කෝප් කමිටුවට දුන් නායකත්වය සම්බන්ධයෙන් ඔහු ප්‍රශංසා කළේය.

ආණ්ඩුකරණයට සැළකිව යුතු දායකත්වයක් ලබාදී තිබියදී, නවවැනි පාර්ලිමේන්තුව තුළ ආංශික අධීක්ෂණ කාරක සභා අහෝසි කිරීම පිළිබඳ ඔහු කණස්සල්ල පළ කළේය.

පසුගිය වසරේ (2023) ආණ්ඩුක්‍රම ව්‍යවස්ථාවේ 21 වැනි සංශෝධනය යටතේ මෙම කමිටු කෙටි කාලීනව පුනර්ජීවනය කිරීමෙන් ඒවායේ වටිනාකම සනාථ වූ බව ජයසූරිය සඳහන් කළේය.

“ආංශික අධීක්ෂණ කාරක සභාවල ප්‍රධාන ශක්තියක් වන්නේ ඔවුන්ගේ සර්ව පාක්ෂික නියෝජනය වන අතර, එය අන්තර්ග්‍රහණය සහ සහයෝගීතාව ප්‍රවර්ධනය කරයි,” යනුවෙන් ඔහු සඳහන් කළේ, ශ්‍රී ලංකාවේ ආකෘතිය තරුණ සහභාගීත්වය සඳහා ඉඩ සලසා ඇති බවත්, එය ගෝලීය වශයෙන් කලාතුරකින් දක්නට ලැබෙන සුවිශේෂී ලක්ෂණයක් බවත් පවසමිනි.

එවැනි වෙනස්කම් පාර්ලිමේන්තුවේ කාර්යක්ෂමතාවට සහ මහජන විශ්වාසයට හානියක් විය හැකි බවට අනතුරු ඇඟවූ ජයසූරිය ආංශික අධීක්ෂණ කාරක සභා ආකෘතිය ප්‍රතිස්ථාපනය කිරීමේ වැදගත්කම පෙන්වා දෙයි.

ප්‍රජාතන්ත්‍රවාදී මූලධර්ම රැකගැනීමට රජයට ලැබී ඇති ප්‍රබල ජනවරම ජනාධිපතිවරයාට සිහිපත් කරන ඔහු, මෙම මූලධර්මවලට හානි කරන ඕනෑම වැදගත් ප්‍රතිපත්තිමය වෙනසක් මහජන විශ්වාසය පළුදු කර රජයේ විශ්වසනීයත්වයට හානි කිරීමේ අවදානමක් ඇති කරන බව සඳහන් කරයි.

සිවිල් සමාජයට දේශපාලන බලයක් නොතිබුණද එය සැළකිව යුතු සමාජ බලපෑමක් ඇති කරන බව ප්‍රකාශ කරන ජයසූරිය, ජනාධිපතිවරයාට කල්පනාකාරීව කටයුතු කරන්නැයි ද ඉල්ලා සිටියේය.