ශ්‍රී ලංකාවේ අනාගත සංවර්ධන ප්‍රමුඛතා පිළිබඳ සාකච්ඡා කිරීම සඳහා ජනාධිපති අනුර කුමාර දිසානායක සහ ලෝක බැංකු සමූහයේ සභාපති අජේ බංගා අතර වීඩියෝ තාක්ෂනය ඔස්සේ හමුවක් පැවත්වී තිබේ.

ඊයේ පැවති මෙම හමුවේදී ලෝක බැංකු සමූහ ව්‍යාපාරයේ සභාපතිවරයා රැකියා උත්පාදනය ප්‍රවර්ධනය කිරීම සහ තීරණාත්මක සංවර්ධන අභියෝගවලට මුහුණ දීම සඳහා ඔහුගේ කැපවීම අවධාරණය කළ බව ජනාධිපති මාධ්‍ය අංශය කියයි.

අධ්‍යාපනය, සෞඛ්‍ය සේවා, සමාජ ආරක්ෂණය සහ ආර්ථික සමෘද්ධිය වැනි ක්ෂේත්‍රවල නව්‍ය විසඳුම් ක්‍රියාවට නැංවීම සඳහා ශ්‍රී ලංකාවට මූල්‍ය සහ තාක්ෂණික සහාය ලබා දීම මෙම ප්‍රමුඛතාවලට ඇතුළත් වේ.

ලෝක බැංකුවේ සහාය ආර්ථික ප්‍රතිපත්ති, මූල්‍ය, තරඟකාරිත්වය, ආයෝජන, ආයතනික සංවර්ධනය සහ දරිද්‍රතාව පිටුදැකීම සඳහා ද විහිදේ.

මීට අමතරව, කෘෂිකර්මාන්තය, ජල කළමනාකරණය, දේශගුණික ක්‍රියාකාරකම්, පාරිසරික තිරසාරත්වය, සමාජ ඇතුළත් කිරීම්, යටිතල පහසුකම් සහ ඩිජිටල් පරිවර්තන ප්‍රගතිය කෙරෙහි අවධානය යොමු කර තිබේ.

විශේෂයෙන්ම ග්‍රාමීය ප්‍රදේශවල දිළිඳුකම පිටුදැකීම කෙරෙහි රජයේ අවධානය යොමුව ඇති බව ජනාධිපති දිසානායක මෙම හමුවේදී අවධාරණය කර ඇත.

විදුලිබල උත්පාදනය සඳහා ආයෝජකයන්ගේ සහභාගීත්වය දිරිමත් කිරීම කෙරෙහි අවධානය යොමු කරමින් සංචාරක ව්‍යාපාරය, සමුද්‍රීය කර්මාන්තය, රාජ්‍ය ව්‍යවසාය සහ බලශක්ති අංශය වැනි ප්‍රධාන අංශ ශක්තිමත් කිරීම මගින් ඩිජිටල්කරණය තුළින් රාජ්‍ය ආදායම වැඩි කිරීමේ අවශ්‍යතාව ද ඔහු අවධාරණය කර තිබේ.

විශේෂයෙන්ම අධ්‍යාපනය, සෞඛ්‍ය සේවා සහ මානව සම්පත් සංවර්ධනය ඉහළ නැංවීම සඳහා ශ්‍රී ලංකාවේ උතුරු සහ නැගෙනහිර ආර්ථික සංවර්ධනය ප්‍රවර්ධනය කිරීමට ගන්නා උත්සාහයන් පිළිබඳ ජනාධිපතිවරයා වැඩිදුරටත් සාකච්ඡා කර ඇත.

මෙම කලාපවල ශ්‍රම බලකායේ ඉහළ යන අවශ්‍යතා සපුරාලීම සඳහා අධ්‍යයන අධ්‍යාපනයට සමගාමීව වෘත්තීය අධ්‍යාපනය වැඩිදියුණු කිරීමේ අවශ්‍යතාව ද ජනාධිපතිවරයා අවධාරණය කර බව ජනාධිපති මාධ්‍ය අංශය කියයි.

2025 ජූලි 25 වැනි දින විවෘත කිරීමට නියමිත දකුණු ආසියාවේ ඒකාබද්ධ කාර්යාලයට සත්කාරකත්වය සැපයීම සඳහා ලොව පුරා රටවල් 20න් එකක් ලෙස ශ්‍රී ලංකාව තෝරාගෙන ඇති බව ලෝක බැංකු සමූහයේ සභාපතිවරයා මෙහිදී අනාවරණ කර තිබේ.

ප්‍රතිසංස්කරණය සහ සංවර්ධනය සඳහා වූ අන්තර්ජාතික බැංකුව (IBRD), අන්තර්ජාතික සංවර්ධන සංගමය (IDA), අන්තර්ජාතික මූල්‍ය සංස්ථාව (IFC) සහ බහුපාර්ශ්වික ආයෝජන ඇපකර නියෝජිතායතනය (MIGA) යන ආයතන හතර සම්බන්ධීකරණය එම කාර්යාලය මගින් සිදුකෙරේ.

මෙම සාකච්ඡාවට ආර්ථික සංවර්ධන නියෝජ්‍ය ඇමැති මහාචාර්ය අනිල් ජයන්ත සහ මුදල් හා ක්‍රමසම්පාදන නියෝජ්‍ය ඇමැති ආචාර්ය හර්ෂණ සූරියප්පෙරුම ද සහභාගී වී තිබිණි.