November 28, 2024
අදානි සමූහය පිළිබඳ එක්සත් ජනපද රජයේ වාර්තාව නෝර්වීජියානු රාජ්‍ය තාන්ත්‍රිකයකු සහ එක්සත් ජාතීන්ගේ පරිසර වැඩසටහනේ හිටපු විධායක අධ්‍යක්ෂ එරික් සෝල්හයිම් විසින් ප්‍රශ්න කර තිබේ.
ඔහු එය හඳුන්වා දී ඇත්තේ ‘අමෙරිකානු සීමාව ඉක්මවා යෑමක්’ ලෙසයි.
වාර්තාවේ ගෝලීය මාධ්‍ය ආවරණය පිළිබඳ අදහස් දක්වමින් ‘අමෙරිකානු සීමාවන් නතර වන්නේ කවදාද?’ යනුවෙන් සෝල්හයිම් ප්‍රශ්න කර ඇත.
ඉන්දියාවේ සූර්ය බලශක්ති කොන්ත්‍රාත්තු සුරක්ෂිත කිරීම සඳහා අල්ලස් ලබාදීමට සාකච්ඡා කළ බවට අදානි සමූහයට සම්බන්ධ ඇතැම් පුද්ගලයන්ට අමෙරිකාව චෝදනා කර තිබේ.
කෙසේවෙතත්, එරික් සෝල්හයිම් පෙන්වා දුන්නේ මෙම චෝදනාවලට සැබෑ අල්ලස් දීම හෝ ඉහළ අදානි නායකයන්ගේ සම්බන්ධය පිළිබඳ සාක්ෂි නොමැති බවයි.
අමෙරිකානු බලධාරීන්ගේ එවැනි ක්‍රියා ඉන්දියාවේ හරිත බලශක්ති පරිවර්තනයට බාධාවක් වන අතර රටේ විශාලතම ආර්ථික බලාගාරයක් කඩාකප්පල් කරන බව ද සෝල්හයිම් පවසයි.
“අමෙරිකානු අධිකාරීත්වය නතර වන්නේ කවදාද? අමෙරිකානු අභිචෝදකයකු විසින් අදානි සමූහයට එරෙහිව අධිචෝදනා ගොනු කිරීම පිළිබඳ පසුගිය සතියේ ගෝලීය මාධ්‍ය පිරී තිබෙනවා. අමෙරිකානු ආක්‍රමණය නවතින්නේ කවදාදැයි ලෝකයම අසන්නට පටන් ගන්නා කාලයයි මේ. අපි මොහොතකට ඉන්දියානු අධිකරණයක් එක්සත් ජනපදයේ කළ බව කියන අපරාධ සම්බන්ධයෙන් ඉහළ අමෙරිකානු ව්‍යාපාරික විධායකයන්ට චෝදනා එල්ල කළ බව උපකල්පනය කරමු. මෙය අමෙරිකාවට පිළිගත හැකිද? අමෙරිකානු මාධ්‍ය එය සුදුසු යැයි සළකයිද? ” එරික් සෝල්හයිම් සිය X ගිණුමේ සටහනක් තබමින් පවසා තිබේ.
