නොවැම්බර් 29 වැනිදායින් පසු කාලගුණ තත්ත්වය තක්සේරු කිරීමෙන් පසු උසස් පෙළ (උ.පෙළ) විභාගය නැවත ආරම්භ කරන දිනය විභාග දෙපාර්තමේන්තුව විසින් ප්‍රකාශයට පත්කරන බව ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා පවසයි.

රජයේ ප්‍රවෘත්ති දෙපාර්තමේන්තුවේ පැවති ප්‍රවෘත්ති සාකච්ඡාවකදී ඔහු කියාසිටියේ, නොවැම්බර් 29 වැනිදායින් පසු වැසි සහ සුළං තත්ත්වය අඩුවනු ඇතැයි කාලගුණ විද්‍යා දෙපාර්තමේන්තුව අනාවැකි පළකර ඇති බවත්, නොවැම්බර් 29 වැනිදායින් පසු කාලගුණ තත්ත්වය තක්සේරු කර විභාගය නැවත ආරම්භ කරන දිනය පිළිබඳව තීරණයක් ගන්නා බවත්ය.

කාලගුණය යහපත් වූ පසු ගංවතුරින් විපතට පත් ප්‍රදේශවල සිසුන්ට යථාතත්වයට පත්වීමට ප්‍රමාණවත් කාලයක් ලබාදිය යුතු බව පැවසූ ඔහු, තත්ත්වය තක්සේරු කිරීමෙන් පසු නව දිනය තීරණය කරන බව පැවැසීය.

පවතින අයහපත් කාලගුණික තත්ත්වය හේතුවෙන් 2024 අ.පො.ස උසස් පෙළ විභාගය නොවැම්බර් 27, 28 සහ 29 යන දිනවල විභාග දෙපාර්තමේන්තුව විසින් අත්හිටුවන ලදී.