November 27, 2024
ආණ්ඩුව විවේචනය කරන විපක්ෂ නායක සජිත් ප්‍රේමදාස පවසන්නේ, ජනවරම නොසළකා හරිමින් හිටපු ජනාධිපති රනිල් වික්‍රමසිංහ පෙන්වා දුන් මාවතේ ආණ්ඩුව ගමන් කරන බවයි.
කොළඹදී ජනමාධ්‍ය වෙත අදහස් දක්වමින් සජිත් ප්‍රේමදාස කියාසිටියේ, මහජනතාවට ප්‍රතිලාභ ලබාදීම සඳහා අන්තර්ජාතික මූල්‍ය අරමුදලේ අනුග්‍රහය සහිත නව සැලැස්මක් පිළිබඳ පොරොන්දු ලබාදී තිබියදීත්, පුරවැසියන්ට දැනෙන සහන ලබාදීමට අපොහොසත් වෙමින් IMF හි නියෝගවලට ආණ්ඩුව යටත් වී ඇති බවයි.
මැතිවරණ ප්‍රචාරක පොරොන්දු සහ ආණ්ඩුවේ ක්‍රියාමාර්ග අතර ඇති පරස්පරතාව පෙන්වාදුන් සජිත් ප්‍රේමදාස, විදුලි මිල සහ ඉන්ධන මිල අඩුකරන බවට දුන් පොරොන්දු තවමත් ඉටු වී නොමැති බව පැවැසීය.
අන්තර්ජාතික මූල්‍ය අරමුදලේ රාමුව තුළ කටයුතු කිරීමට තම පක්ෂය සහාය දෙන අතරම, මහජනතාව මත පැටවෙන බර අවම කිරීම සඳහා බදු ව්‍යුහයන් ප්‍රතිසංස්කරණය කිරීමට කැපවී සිටින බවද ඔහු අවධාරණය කළේය.
ආණ්ඩුවේ විනිවිදභාවයේ අඩුවක් පවතින බව ද සඳහන් කළ විපක්ෂ නායකවරයා, අර්ථවත් ප්‍රතිසංස්කරණ ක්‍රියාත්මක කිරීමට ආණ්ඩුවට ඇති නොහැකියාව විවේචනය කළේය.
