මිස්ටර් වර්ල්ඩ් (Mr:World) තරගාවලියට සහභාගී වී, ලෝකයේ කඩවසම් තරුණයන් අතරින් අවසන් දසදෙනා (Top 10) අතරට තේරී පත් වූ , මේඝ සූරියආරච්චි ඊයේ (26) මධ්‍යම රාත්‍රී කටුනායක ගුවන් තොටුපොළ වෙත පැමිණියේය .

ශ්‍රී ලංකාවේ පැවති මිස්ටර් ශ්‍රී ලංකා ( Mr. Sri Lanka ) තරගාවලියේ දී මෙරට කඩවසම්ම තරුණයා ලෙස තේරීපත් වූ මේඝ සූරියආරච්චි , මෙම ලෝක මිස්ටර් වර්ල්ඩ් තරගාවලියට ඉදිරිපත් වී තිබේ .

මෙම තරගාවලියේ දී අවසන් දස දෙනා අතරට තේරී පත්වීම ශ්‍රී ලංකාව මෙවැනි තරගාවලියක දී අන්තර්ජාතික වශයෙන් ලබාගත් ප්‍රථම ජයග්‍රහණය බව මේඝ කටුනායක ගුවන් තොටුපොළේ දී පැවසීය .

මීට අමතරව මෙම තරගාවලියේ දී හොදම ඇදුම් නිර්මාණයට හිමි සම්මානයත් , මෙම තරගාවලියේ වැඩිම ප්‍රේක්ෂක ප්‍රසාදය හිමි කර ගත් තරුණයාට හිමි සම්මානයත් දිනා ගත් මේඝ සූරියආරච්චි ආසියාවේ කඩවසම් තරුණයන් අතරින් දෙවන ස්ථානයත් දිනා ගැනීමට ද සමත් වී තිබිණි .

මෙම ජයග්‍රහණ හිමිකර ගත් මේඝ සූරියආරච්චි ඊයේ මධ්‍යම රාත්‍රී 11.45 ට සිංගප්පූරුවේ සිට සිංගප්පූරු ගුවන් සේවයේ එස්.කිව් – 468 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබිණි .

ඔහු පිළිගැනීම සදහා සංගීතා වීරරත්න , ඔහුගේ ප්‍රධාන රූපලාවණ්‍ය උපදේශක ධනංජය බණ්ඩාර ඇතුළු විශාල පිරිසක් කටුනායක ගුවන් තොටුපොළ වෙත පැමිණ සිටියහ.