පොලිස් ස්ථාන මාරු ලැයිස්තුව අනුමත කිරීම නැවත වරක් ප්‍රමාද වී ඇති බව වාර්තා වේ.

ඒ, යෝජිත ලැයිස්තුව නැවත නැවතත් වෙනස් කරන බවට ජාතික පොලිස් කොමිසම පොලිස් දෙපාර්තමේන්තුවට චෝදනා කිරීමත් සමඟය.

මේ හේතුවෙන් මෙතෙක් ඉදිරිපත් කර ඇති නාමලේඛනය ජාතික පොලිස් කොමිසම විසින් අනුමත කර නොමැති අතර එම ලැයිස්තුවේ සංශෝධිත සහ අවසන් කරන ලද පිටපත හෙට (25) වන විට ඉදිරිපත් කරන ලෙස පොලිස්පතිවරයාට දන්වා ඇත.

ජ්‍යෙෂ්ඨ නියෝජ්‍ය පොලිස්පතිවරුන්ගේ සිට පහළම නිලයන් දක්වා වූ පොලිස් නිලධාරීන්ගේ ස්ථාන මාරුවීම් ලැයිස්තුව මැතිවරණ කාලසීමාව හේතුවෙන් මාස දෙකකට ආසන්න කාලයක් ප්‍රමාද වීමෙන් පසු ගිය සතියේ පළමු වරට සමාලෝචනයට ගත් දා සිට අවම වශයෙන් හතර වතාවක් සංශෝධනය කර ඇති බව වාර්තා වේ.

ජාතික පොලිස් කොමිසමේ සභාපති ලලිත් ඒකනායක පවසා ඇත්තේ, ස්ථාන මාරුවීම් ලැයිස්තුව කොමිසමට ඉදිරිපත් කිරීමෙන් පසු විවිධ වෙනස්කම්වලට භාජනය වී ඇති බවයි.

ස්ථාන මාරුවීම් ලැයිස්තුව අවසන් කිරීමේ රැස්වීමකට පැමිණෙන ලෙස පසුගිය බදාදා (20) ඔවුන් වැඩබලන පොලිස්පති ප්‍රියන්ත වීරසූරියගෙන් ඉල්ලීමක් ද කර තිබේ.

“රැස්වීම පැය දෙකක පමණ කාලයක් පැවති අතර රැස්වීමේදී පවා සංශෝධන සිදුවුණා. එක් මාරුවක් වෙනස් වූ විට, එය තවත් ස්ථාන මාරු කිහිපයකට බලපානවා. ඒ නිසා අපි පොලිස්පතිතුමාට කිව්වා සඳුදාට අලුත් සහ අවසන් ලැයිස්තුවක් ඉදිරිපත් කරන්න කියලා,” යනුවෙන් ඒකනායක පවසා ඇත.

ජනාධිපතිවරණ සමයේදී මැතිවරණ කොමිසම විසින් පැනවූ අත්හිටුවීමක් හේතුවෙන් ස්ථාන මාරු ක්‍රියාවලිය මාස දෙකකට ආසන්න කාලයක් ප්‍රමාද වූ බව ජාතික පොලිස් කොමිසමේ සභාපතිවරයා සඳහන් කළේය.

“ජනාධිපතිවරණයෙන් පස්සේ මහ මැතිවරණයක් තිබුණා. මැතිවරණ ක්‍රියාවලිය අවසන් වී සතියක් බලා සිටීමට සිදු වුණා. පසුගිය බ්‍රහස්පතින්දා (21) තමයි ජාතික පොලිස් කොමිසම රැස් වුණේ. කෙසේවෙතත්, අපට ලැයිස්තුව අවසන් කිරීමට නොහැකි වුණා” යනුවෙන් ඔහු පවසා ඇත.

21 වැනි සංශෝධනය යටතේ පිහිටුවන ලද ජාතික පොලිස් කොමිසමට පොලිස්පතිවරයා හැර පොලිස් නිලධාරීන් පත් කිරීමට, උසස් කිරීමට, ස්ථාන මාරු කිරීමට, විනය කටයුතු කිරීමට සහ සේවයෙන් පහ කිරීමට බලය ඇත.

එය පොලිසියට එරෙහි මහජන පැමිණිලි හසුරුවන අතර පිළියම් සහතික කරයි.

පොලිස් සේවයේ බඳවා ගැනීම්, උසස්වීම්, ස්ථාන මාරුවීම්, පුහුණුව, කාර්යක්‍ෂමතාව සහ ස්වාධීනත්වය කොමිෂන් සභාව අධීක්ෂණය කරයි.

මීට අමතරව, එය චර්යාධර්ම සංග්‍රහ සහ විනය පටිපාටි සැකසීම, ජාතික සහ පළාත් පොලිස් කොට්ඨාස විසින් භාවිත කරන ආයුධ සහ පතොරම් ආදිය පිළිබඳ තීරණ ගැනීම් ද සිදු කරයි.

පොලිස් නිලධාරීන් 210 දෙනෙකුට වහා ස්ථාන මාරුවක් ලබා දෙන ලෙස එවක පොලිස්පතිවරයාගෙන් කළ ඉල්ලීම ජූලි මාසයේදී ජාතික පොලිස් කොමිසම ප්‍රතික්ෂේප කළේය.

මෙම ස්ථාන මාරු සඳහා වන නිර්දේශ ස්ථාපිත ස්ථාන මාරු ප්‍රතිපත්තිවලට අනුකූල නොවන බව ජාතික පොලිස් කොමිසම විසින් සොයා ගන්නා ලදී.

මීට අමතරව, එළැඹෙන ජනාධිපතිවරණයට පෙර මෙවැනි මහා පරිමාණ ස්ථාන මාරුවීම් නොකරන ලෙස ජාතික පොලිස් කොමිසම උපදෙස් දුන්නේය.

කෙසේවෙතත්, විනය ක්‍රියාමාර්ග සහ වෛද්‍ය නිර්දේශ සළකා බැලීමෙන් අනතුරුව නිලධාරීන් 24 දෙනෙකුට ස්ථාන මාරුවීම් ලබාදීමට කොමිසම අනුමැතිය ලබා දී තිබේ.

මේ අතර, පොලිස් ස්ථානාධිපතිවරුන් 14 දෙනෙකු ඔවුන්ගේ තනතුරුවලින් ඉවත් කර ඔවුන් සාමාන්‍ය රාජකාරිවලට පහත හෙළීමට ජාතික පොලිස් කොමිසම නිර්දේශ කර ඇති අතර වහාම විනය පරීක්ෂණ සඳහා කොන්දේසියක් ද පනවා ඇත.

විමර්ශන අතරතුර, විනය ක්‍රියාමාර්ගවලින් නිදහස් කරන ලද නිලධාරීන් අනුමත කරන්නේ නම්, ඔවුන්ගේ පෙර කාර්ය භාරයට සමාන තනතුරුවලට නැවත අනුයුක්ත කරනු ලැබේ.

තවද, පොලිස් ස්ථානාධිපතිවරුන් 8 දෙනෙකු නිත්‍ය රාජකාරි සඳහා යළි අනුයුක්ත කිරීමට ජාතික පොලිස් කොමිසම අනුමැතිය ලබා දුන් අතර තවත් පොලිස් ස්ථානාධිපතිවරුන් 8 දෙනෙකු සඳහා ස්ථාන මාරු ඉල්ලීම් ද ලබා දී ඇත.

මීට අමතරව වෛද්‍ය හේතූන් මත නිලධාරීන් දෙදෙනෙකු ස්ථාන මාරු කර ඇත.

ඔක්තෝබර් මාසයේදී උසස් පොලිස් නිලධාරීන් අතර කැපී පෙනෙන ස්ථාන මාරුවීම් කිහිපයක් සිදු විය.

අපරාධ පරීක්ෂණ දෙපාර්තමේන්තුව (CID) භාරව සිටි නියෝජ්‍ය පොලිස්පති රොහාන් ප්‍රේමරත්න බස්නාහිර පළාතේ (උතුර) නියෝජ්‍ය පොලිස්පතිවරයා ලෙස යළි අනුයුක්ත කර තිබේ.

ප්‍රේමරත්න වෙනුවට අපරාධ පරීක්ෂණ දෙපාර්තමේන්තුවේ නව නියෝජ්‍ය පොලිස්පතිවරයා ලෙස නියෝජ්‍ය පොලිස්පති පී.අම්පාවිල පත්කෙරිණි.

මෙයට පෙරඅම්පාවිල විසින් මුදල් විශුද්ධිකරණය, තහනම් පිරමීඩ ක්‍රම සහ අතථ්‍ය මුදල් වර්ග විමර්ශනය කරන පොලිස් මූලස්ථානයේ මුල්‍ය බුද්ධි අංශය 2 අධීක්‍ෂණය කළේය.

අනෙකුත් ජ්‍යෙෂ්ඨ ස්ථාන මාරුවීම්වලට නියෝජ්‍ය පොලිස්පති ඩී.පී. චන්ද්‍රසිරි, ගාල්ල සිට වෙනත් ස්ථානයකට අනුයුක්ත කළ නියෝජ්‍ය පොලිස්පති ඊ.එම්.ජී.ජේ. සේරම්, ප්‍රජා පොලිස් සහ පරිසර ආරක්ෂණ කොට්ඨාසයේ සිට ගාලු කොට්ඨාසයේ නියෝජ්‍ය පොලිස්පතිවරයා ලෙස සේවය කිරීමට මාරු විය.

කාන්තා නියෝජ්‍ය පොලිස්පති බිම්ෂානි ජසින් ආරච්චි ප්‍රජා පොලිස් සහ පරිසර ආරක්ෂණ කොට්ඨාසය අධීක්‍ෂණය කිරීම සඳහා පොලිස් මූලස්ථානයේ බඳවා ගැනීමේ සහ පුහුණු කොට්ඨාසයේ සිට ස්ථාන මාරු කර ඇත.

ජාතික පොලිස් කොමිසම විසින් අනුමත කරන ලද සියලුම ස්ථාන මාරුවීම් මැතිවරණ කොමිෂන් සභාවේ අනුමැතියට යටත් විය.

සංශෝධිත පොලිස් ස්ථාන මාරුවීම් ලැයිස්තුව හෙට (25) ජාතික පොලිස් කොමිසමට ඉදිරිපත් කරන බව මහජන ආරක්‍ෂක අමාත්‍යාංශයේ ලේකම් රවී සෙනෙවිරත්න තහවුරු කර තිබේ.

(The Sunday Morning)