ගුරුවරුන් දෙදෙනකු විසින් සිදුකළ බව කියන පහරදීමක් හේතුවෙන් මාස තුනකට අධික කාලයක් රෝහල්ගතව සිටි වෙන්නප්පුව ප්‍රදේශයේ ජනප්‍රිය පාසලක 10 වැනි ශ්‍රේණියේ ඉගෙනුම ලබන 16 හැවිරිදි සිසුවියක් රාගම ශික්ෂණ රෝහලේ ප්‍රතිකාර ලබමින් සිටියදී නොවැම්බර් 13 වැනිදා මියගොස් තිබේ.

පශ්චාත් මරණ පරීක්‍ෂණයේදී හෙළිව ඇත්තේ, පහරදීම හේතුවෙන් මොළයේ රුධිර වහනයකින් ඇයගේ මරණය සිදුව ඇති බවයි.

රක්‍ෂිත බන්ධනාගාරගත කිරීමෙන් පසු මුලින් ඇප මත මුදාහැර සිටි අදාළ ගුරුවරුන් දෙදෙනා නොවැම්බර් 14 වැනිදා යළි අත්අඩංගුවට ගෙන නොවැම්බර් 18 වැනිදා දක්වා රක්ෂිත බන්ධනාගාරගත කළ බව පොලිසිය පවසයි.

සිසුවිය තවත් අයකු සමඟ පන්ති කාමරයට යෑමට විනාඩි 20කට වැඩි කාලයක් ගතවීමත් සමඟ මෙම සිදුවීම සිදුව ඇති බව වාර්තා වේ.

ප්‍රමාදය සම්බන්ධයෙන් පැහැදිලි කිරීම් ලබාදී දඬුවම් වශයෙන් තමන් ඇයට ශාරීරිකව පහරදී දණගැස්වූ බව විමසීමකදී ගුරුවරුන් පොලිසිය හමුවේ පිළිගෙන ඇතැයි පැවැසේ.

වෙන්නප්පුව පොලිසිය විසින් සිදුකළ විමර්ශනවලින් අනතුරුව 39 සහ 57 හැවිරිදි වියේ පසුවන මෙම ගුරුවරුන් දෙදෙනා අත්අඩංගුවට ගෙන අධිකරණයට ඉදිරිපත් කර ඇත.

ඔවුන් මුලින් රක්ෂිත බන්ධනාගාරගත කර පසුව සැප්තැම්බර් 13 වැනිදා ඇප මත මුදාහැරිණි.

අගෝස්තු 9 වැනිදා සිදුවූ මෙම පහරදීමේ ප්‍රතිඵලයක් ලෙස සිසුවිය මුලින් මාරවිල රෝහලට ඇතුළත් කර ඇති අතර එහිදී ඇයගේ හිසට ශල්‍යකර්මයක් සිදුකර ඇත. පසුව ඇය වැඩිදුර ප්‍රතිකාර සඳහා කොළඹ ජාතික රෝහලට මාරුකර යවා ඇත.

ප්‍රතිකාර ලබමින් සිටින අතරතුර පොලිස් නිලධාරීන් ඇයගේ ප්‍රකාශය සටහන් කර ගැනීමට තෙවරක් උත්සාහ කර ඇති නමුත්, දැඩි සත්කාර ඒකකයේ ඇයගේ තත්ත්වය අසාධ්‍ය වීම හේතුවෙන් එම උත්සාහයන් අසාර්ථකවී තිබේ.

පසුව ඇය භෞතචිකිත්සාව සඳහා රාගම රෝහලට මාරුකර යවා ඇති අතර, එහිදී ඇය නොවැම්බර් 13 වැනිදා රාත්‍රියේ මියගොස් ඇත.

නොවැම්බර් 15 වැනිදා සවස සිසුවියගේ දේහය ඇගේ ඥාතීන්ට භාරදී තිබේ.