චීන මහජන විමුක්ති හමුදා නාවික හමුදා රුවල් පුහුණු යුද නෞකාවක් වන ‘PO LANG’ නිල සංචාරයක් සඳහා අද (2024 ඔක්තෝබර් 08) උදෑසන කොළඹ වරායට සේන්දු විය.

ශ්‍රී ලංකා නාවික හමුදාව විසින් නාවික සම්ප්‍රදායන්ට අනුකූලව මෙම නෞකාව පිළිගන්නා ලදී.

‘PO LANG’ යනු මීටර් 86ක් දිග රුවල් පුහුණු යාත්‍රාවක් වන අතර එය කැඩෙට් නිලධාරීන් 35ක් ඇතුළු 130 දෙනෙකුගෙන් සමන්විත වේ.

මේ අතර, නෞකාවේ අණදෙන නිලධාරී, කමාන්ඩර් මා වෙන්යොන්ග් අද බටහිර නාවික විධාන මූලස්ථානයේදී බටහිර නාවික විධානය භාර ආඥාපති, රියර් අද්මිරාල් චින්තක කුමාරසිංහ හමුවීමට නියමිතව තිබිණි.

දෙරටේ නාවික හමුදා අතර සුහදතාවය ශක්තිමත් කිරීම සඳහා ශ්‍රී ලංකා නාවික හමුදාව විසින් සංවිධානය කරනු ලබන වැඩසටහන් මාලාවකට නෞකාවේ කාර්ය මණ්ඩල සාමාජිකයන් සහභාගී වීමට නියමිතය.

මීට අමතරව නෞකාවේ කාර්ය මණ්ඩල සාමාජිකයින් කොළඹ රැඳී සිටින කාලය තුළ දිවයිනේ සංචාරක ආකර්ෂණ ස්ථාන කිහිපයක් ගවේෂණය කරනු ඇත.

මීට අමතරව, ශ්‍රී ලංකා නාවික හමුදා සාමාජිකයන්ට නෞකාවන්හි මෙහෙයුම් කටයුතු පිළිබඳ දැනුවත් කිරීම් සඳහා ද සහභාගී වීමට අවස්ථාව ලැබේ.

සංචාරය නිමා කරමින් ‘PO LANG’ ඔක්තෝබර් 11 වැනිදා දිවයිනෙන් පිටත් වේ.