2025 වසරේ පෙබරවාරි මස පැවැත්වීමට නියමිත ශ්‍රී ලංකා නීතීඥ සංගමයේ නිලවරණයේදී 2025/2026 වසර සඳහා එහි සභාපති ධුරය වෙනුවෙන් නීතීඥ රජීව් අමරසූරිය තරඟ කිරීමට තීරණය කර තිබේ.

කොවිඩ් වසංගතය හේතුවෙන් රට අගුලු දැමීම මධ්‍යයේ 2020 පෙබරවාරි මාසයේදී ඔහු ශ්‍රී ලංකා නීතීඥ සංගමයේ ලේකම් ලෙස තේරී පත්විය.

ශ්‍රී ලංකා නීතීඥ සංගමයේ ලේකම්වරයා වශයෙන්, ඔහු අඛණ්ඩ නීති අධ්‍යාපන සහ වෘත්තීය සංවර්ධන වැඩසටහන් මෙහෙයවූ අතර, සම්පත් දායකයන් ලෙස නීතිඥයින් 500කට අධික පිරිසකගේ සහාය ඇතිව Webinar 175ක් සම්පූර්ණ කරමින් භාෂා තුනෙන්ම පවත්වනු ලබන ශ්‍රී ලංකා නීතීඥ සංගමයේ Webinar මාලාව හඳුන්වා දුන්නේය.

කොළඹ රාජකීය විද්‍යාලයෙන් ප්‍රාථමික හා ද්විතීයික අධ්‍යාපනය හැදෑරූ අමරසූරිය එහිදී ජ්‍යෙෂ්ඨ ශිෂ්‍ය නායකයකු සහ විද්‍යාල සඟරාවේ කර්තෘවරයා ද විය.

1997/1998 කණ්ඩායමෙන් කොළඹ විශ්වවිද්‍යාලයේ නීති පීඨයට ඇතුළත් වූ ඔහු දෙවැනි පන්තියේ ඉහළ ගෞරවයක් ලබා ගනිමින් උපාධිය ලබා ගත්තේය.

ඉන් අනතුරුව ඔහු සිය අවසන් කඩඉම් විභාගය සඳහා ශ්‍රී ලංකා නීති විද්‍යාලයට ඇතුළත් වූ අතර එහිදී ඔහු එම කණ්ඩායමේ ප්‍රථම ස්ථානයට පත්වෙමින් විනිසුරු ශිව සුප්‍රමනියම් රන් පදක්කම ද දිනා ගත්තේය.

අමරසූරිය කළමනාකරණ ගණකාධිකාරීවරුන්ගේ වරලත් ආයතනයේ (එක්සත් රාජධානියේ), වරලත් ගෝලීය කළමනාකරණ ගණකාධිකාරීවරයකු සහ ශ්‍රී ලංකා සහතිකලත් කළමනාකරණ ගණකාධිකාරීවරුන්ගේ ආයතනයේ සාමාජිකයෙකු වන අතර හාවඩ් කෙනඩි පාසලේ (විධායක අධ්‍යාපනය) ආදි ශිෂ්‍යයෙකි.

2013 වසරේ වයස අවුරුදු 40ට අඩු විශිෂ්ටතම CIMA සාමාජිකයා ලෙසත් 2021 වසරේ CIMA – LMD Trailblazer ලෙසත් කළමනාකරණ ගණකාධිකාරීවරුන්ගේ වරලත් ආයතනයේ රන් තරු සම්මානයෙන් පිදුම් ලැබුවේද අමරසූරියයි.

ජනාධිපති නීතිඥ ආචාර්ය කේ. කනග්-ඊශ්වරන්ගේ සහ ජනාධිපති නීතිඥ සංජීව ජයවර්ධන සමගත් ඉන්පසු 2013 දක්වා දශකයක් ජනාධිපති නීතිඥ සංජීව ජයවර්ධනගේ කනිෂ්ඨ නීතීඥවරයකු ලෙස කටයුතු කර ඇති ඔහු දැන් අභියාචනාධිකරණයේ පවතින පොදු නීති ක්ෂේත්‍රවල සහ සිවිල් නඩු පැවරීමේ බොහෝ අංශවල ස්වාධීන වෘත්තිකයෙකු ලෙස කටයුතු කරයි.

ඔහු සිවිල් සහ වාණිජ ක්ෂේත්‍රවල ආයතනික සහ නීති උපදේශකත්වය ද සපයයි.

අමරසූරිය ශ්‍රී ලංකා මහ බැංකුවේ (කලින් මුදල් මණ්ඩලයේ) මෙන්ම එහි මුදල් ප්‍රතිපත්ති මණ්ඩලයේ පාලක මණ්ඩලයේ සාමාජිකයකු ලෙස නම් කරන ලදී.

ඔහු කොළඹ විශ්වවිද්‍යාලයේ සනාතන මණ්ඩල සාමාජිකයකු වන අතර විශ්වවිද්‍යාල ප්‍රතිපාදන කොමිෂන් සභාවේ නීති අධ්‍යයන ස්ථාවර කමිටුවේ සාමාජිකයකු ද වේ.

ඔහු පොදුරාජ්‍ය මණ්ඩලීය නීති අධ්‍යාපන සංගමයේ මෙරට නියෝජිතයා ද වන අතර 2021 සිට ආසියා සහ පැසිෆික් කලාපය සඳහා වන නීති සංගමයේ (LAWASIA) විධායක කමිටු සාමාජිකයකු ද වේ.

ඊට අමතරව ඔහු ශ්‍රී ලංකා නීති අධ්‍යාපන කවුන්සිලයේ සාමාජිකයකු, ශ්‍රී ලංකා සුරැකුම්පත් හා විනිමය කොමිෂන් සභාවේ කොමිෂන් සභාවේ සාමාජිකයකු සහ ශ්‍රී ලංකා ජාතික බේරුම්කරණ මධ්‍යස්ථානයේ පාලක මණ්ඩල සාමාජිකයකු ලෙස ද කටයුතු කර ඇත.