2019 වසරේ සිදුවූ පාස්කු ඉරිදා ප්‍රහාරය සම්බන්ධයෙන් බ්‍රිතාන්‍යයේ චැනල් ෆෝ නාලිකාව කළ චෝදනා විමර්ශනය කළ ජනාධිපති කොමිෂන් සභා වාර්තාව අතුරුදන් වී ඇති බව කොළඹ අගරදගුරු පදවියේ සන්නිවේදන අධ්‍යක්ෂ සිරිල් ගාමිණී ප්‍රනාන්දු පියතුමා පවසයි.

බණ්ඩාරනායක සම්මන්ත්‍රණ ශාලාවේ පසුගිය අඟහරුවාදා පැවති උත්සවයකට එක්වෙමින් සිරිල් ගාමිණී පියතුමන් කියා සිටියේ කොමිසමේ වාර්තාව ජනාධිපති රනිල් වික්‍රමසිංහට ලැබුණු බවත්, පසුව එය නීතිපති දෙපාර්තමේන්තුවට භාරදුන් නමුත් මේ වන විට එය අතුරුදන් වී ඇති බවත්ය.

ලැබී ඇති ආරංචි මාර්ගවලට අනුව ප්‍රහාරය පිළිබඳ සැබෑ සාක්ෂි සහ අනෙකුත් තීරණාත්මක තොරතුරු වාර්තාවෙන් හෙළි වූ බව පියතුමා වැඩිදුරටත් අනාවරණය කළේය.

මෙම කරුණු හෙළිදරව් වී නව රජයෙන් නිසි පරීක්ෂණයක් සිදු කළහොත් දේශපාලනඥයන් කිහිප දෙනෙකු සිරගත වනු ඇති බව ද ඔහු සඳහන් කළේ.

පාස්කු ඉරිදා ප්‍රහාරයේ නායක සහරාන් සමඟ සම්බන්ධතා පැවැත්වූ ‘අබුහින්ද්’ 2019 ප්‍රහාරය පිටුපස සිටි ප්‍රධාන පුද්ගලයා බව ද ප්‍රනාන්දු පියතුමා අවධාරණය කළේය.

මීට අමතරව, මහජන ආරක්ෂක අමාත්‍යාංශයට අලුතින් පත් වූ ලේකම් රවී සෙනෙවිරත්න ද පාස්කු ඉරිදා ප්‍රහාරයට අදාළ ඇතැම් තොරතුරු දන්නා බව ඔහු අනාවරණ කළේය.

හිටපු ජනාධිපති රනිල් වික්‍රමසිංහ පත්වීමෙන් පසු පාස්කු ඉරිදා ප්‍රහාරය සහ ඒ ආශ්‍රිත චෝදනා විමර්ශනය කිරීම සඳහා විශේෂ කමිටු දෙකක් ස්ථාපිත කර තිබිණි.

ප්‍රහාරයේ දී හමුදාවේ භූමිකාව සම්බන්ධයෙන් චැනල් ෆෝ කළ හෙළිදරව් කිරීම්වලට ප්‍රතිචාර වශයෙන් පළමු කමිටුව 2023 සැප්තැම්බර් 11 වැනි දින පත් කරන ලදී.

විශ්‍රාමලත් ශ්‍රේෂ්ඨාධිකරණ විනිසුරු එස්.අයි.ඉමාම්ගේ ප්‍රධානත්වයෙන් විශ්‍රාමික ගුවන් හමුදාපති ජයලත් වීරක්කොඩි සහ ජනාධිපති නීතිඥ හර්ෂ ඒ.ජේ.සොයිසා මෙම කමිටුවට ඇතුළත් වූහ.

ඔවුන්ගේ අවසන් වාර්තාව 2024 ජූනි 25 දින හිටපු ජනාධිපති වික්‍රමසිංහ වෙත ඉදිරිපත් කර තිබිණි.

2024 ජුනි 12 වැනි දින පත් කරන ලද දෙවැනි කමිටුව, පූර්ව අනතුරු ඇඟවීම් ලැබී තිබියදීත් ප්‍රහාරය වැළැක්වීමට බුද්ධි අංශ අපොහොසත් වීම පිළිබඳ විමර්ශනය කිරීම අරමුණු කර තිබිණි.

විශ්‍රාමලත් විනිසුරු ඒ.එන්.ජේ.අල්විස්ගේ සභාපතිත්වයෙන් යුත් මෙම කමිටුව 2024 සැප්තැම්බර් 14 වැනිදා සිය සොයාගැනීම් ඉදිරිපත් කළේය.