October 2, 2024
2024 මහ මැතිවරණයට පෙර පොදු විපක්ෂයේ පොදු සන්ධානයකට පොදු ලකුණක් යටතේ තරග වැදීමට එකඟවන්නේ නම්, සමගි ජන බලවේගයේ නායක සජිත් ප්‍රේමදාස අගමැති අපේක්ෂකයා ලෙස පිළිගැනීමට එජාපය ඇතුළු විපක්ෂයේ කණ්ඩායම් කැමැත්තෙන් සිටින බව වාර්තා සඳහන් කරයි.
හිටපු ජනාධිපති රනිල් වික්‍රමසිංහගේ සමීපතමයෙකු වන හිටපු පාර්ලිමේන්තු මන්ත්‍රී සමන් රත්නප්‍රිය ජනමාධ්‍ය වෙත ප්‍රකාශ කළේ, පොදු ලකුණක් යටතේ පොදු විපක්ෂ සන්ධානයකට එකඟ වන්නේ නම් සජිත් ප්‍රේමදාස අගමැති අපේක්ෂකයා ලෙස සාදරයෙන් පිළිගන්නා බවයි.
“සජිත් ප්‍රේමදාස පොදු ලකුණක් යටතේ පොදු විපක්ෂ සන්ධානයක් පිහිටුවීමට එකඟ වුණොත් අගමැති අපේක්ෂකයා ලෙස පිළිගැනීමට අපි සූදානම්. නමුත් ප්‍රශ්නය තමයි සමගි ජන බලවේගයට අවශ්‍ය පොදු සන්ධානයේ සංකේතය දුරකථනය වීම. හවුල්කරුවෙකුගේ සංකේතයක් යටතේ කිසිදු සන්ධානයක් ගොඩනැගෙන්නේ නැහැ. ඒක පොදු සංකේතයක් වෙන්න ඕනේ” යැයි රත්නප්‍රිය පැවැසීය.
“කොහොම උණත්, අපි දින දෙකකින් පොදු සංකේතය පිළිබඳ අවසන් තීරණය ගන්නවා. ඊට පස්සේ අපි පොදු සංකේතයක් පිළිබඳ නිවේදනයක් කරනවා” ඔහු වැඩිදුරටත් සඳහන් කළේය.
මේ අතර සජිත් ප්‍රේමදාසට එජාපය භාරගෙන පොදු සන්ධානයක් ගොඩනැගීමට හැකිවන පරිදි එජාප නායකත්වයෙන් ඉල්ලා අස්වන ලෙස තම පක්ෂය හිටපු ජනාධිපති රනිල් වික්‍රමසිංහට නිල වශයෙන් දැනුම් දුන් බව සමගි ජන බලවේගයේ ප්‍රධාන ලේකම් රංජිත් මද්දුම බණ්ඩාර පවසයි.
එහෙත් එජාප නායකත්වයෙන් ඉවත් වීමට රනිල් වික්‍රමසිංහ එකඟ වී නැති බවද රංජිත් මද්දුම බණ්ඩාර සඳහන් කර ඇත.
මේ අතර හිටපු පාර්ලිමේන්තු මන්ත්‍රී මනූෂ නානායක්කාර ජනමාධ්‍ය වෙත ප්‍රකාශ කළේ, පොදු ලකුණ අලියා විය යුතු බවට ඇතැම් එක්සත් ජාතික පාක්ෂිකයන්ගේ ඉල්ලීමක් පවතින බවයි.
