නෙළුම් කුළුණේ කැසිනෝ ව්‍යාපාරයක් පවත්වාගෙන යෑමට ජනාධිපති රනිල් වික්‍රමසිංහ ප්‍රමුඛ පසුගිය රජය බලපත්‍ර ලබාදීමට ගත් තීරණයෙන් රජයට රුපියල් බිලියන 85ක පාඩුවක් සිදුව ඇතැයි කියන පෙත්සමක් ශ්‍රේෂ්ඨාධිකරණය හමුවේ විභාගයට ගෙන තිබේ.

පෙත්සම්කාර පූජ්‍ය මල්ගල්ලේ සුජාත හිමියන් වෙනුවෙන් පෙනී සිටි ජනාධිපති නීතීඥ නවීන් මාරපන අධිකරණයට දන්වා සිටියේ පසුගිය රජය කොළඹ නෙළුම් කුළුණේ කැසිනෝ ශාලාවක් පවත්වාගෙන යෑමට 2024 ජූලි මාසයේදී රුපියල් මිලියන 500ක මුදලකට කැසිනෝ බලපත්‍රයක් ලබාදී තිබීම ඉතා බරපතළ කාරණයක් බවයි.

එවැනි බලපත්‍රයක් ලබා දීමට නව රෙගුලාසි යටතේ ඩොලර් මිලියන 250 (රුපියල් බිලියන 75) ආයෝජනයක් සහ රුපියල් බිලියන10ක බලපත්‍ර ගාස්තුවක් හෝ ඩොලර් මිලියන 500ක ආයෝජනයක් සහ බලපත්‍ර ගාස්තුව රුපියල් බිලියන 5ක් අවශ්‍ය වීම ඊට හේතුව බව පෙත්සමෙන් පෙන්වා දී තිබේ.

එබැවින් සීමාසහිත ගෝල්ඩන් අයිලන්ඩ් හොස්පිටැලිටි ලිමිටඩ් විසින් මෙහෙයවීමට නියමිත් මැජෙස්ටික් ප්‍රයිඩ් කැසිනෝ ශ්‍රී ලංකා වෙත මෙම බලපත්‍රය ලබා දීමෙන් රජයට සිදුවන පාඩුව අවම වශයෙන් රුපියල් බිලියන 85ක් බව ජනාධිපති නීතීඥ නවීන් මාරපන තර්ක කළේය.

නීතිපතිවරයා වෙනුවෙන් පෙනී සිටි රජයේ ජ්‍යෙෂ්ඨ නීතීඥවරයා කියා සිටියේ මේ සම්බන්ධයෙන් උපදෙස් ලබාගැනීමට කාලය අවශ්‍ය බවත් එය කල් දමන ලෙසත් ඉල්ලා සිටින බවයි.

වගඋත්තරකරුවන්ට අවශ්‍ය නම් සීමිත විරෝධතා ගොනු කිරීමට ශ්‍රේෂ්ඨාධිකරණය කාලය ලබා දුන් අතර නඩුව ඔක්තෝබර් 14 වැනි දින නැවත කැඳවීම සඳහා නියම කරන ලදී.

පෙත්සම්කරු වෙනුවෙන් සනත් විජේවර්ධනගේ උපදෙස් මත ජනාධිපති නීතීඥ නවීන් මාරපන, නීතීඥ කෞෂල්‍යා මොල්ලිගොඩ සහ උචිත වික්‍රමසිංහ පෙනී සිටියහ.

Majestic Pride Group of Casinos and Hotels ඉන්දියාවේ ගෝවා හි කැසිනෝ මධ්‍යස්ථාන 2 ක් සහ නේපාලයේ කත්මන්ඩු හි එක් මධ්‍යස්ථානයක් පවත්වාගෙන යයි.

ශ්‍රී ලංකාවේ මැජෙස්ටික් ප්‍රයිඩ් කැසිනෝ පිහිටුවීම සඳහා ඉන්දියාවේ ප්‍රමුඛ පෙළේ ක්‍රීඩා කණ්ඩායමක් වන සුප්‍රසිද්ධ Majestic Group Hotels and Casinos සමඟ ගිවිසුමකට එළැඹී ඇති බව සීමාසහිත ගෝල්ඩන් අයිලන්ඩ් හොස්පිටැලිටි ලිමිටඩ් අගෝස්තු මාසයේදී නිවේදනය කළේය.

ශ්‍රී ලංකා මුදල්, ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය විසින් 2010 අංක 17 දරන කැසිනෝ ව්‍යාපාර (නියාමන) පනත යටතේ සීමාසහිත ගෝල්ඩන් අයිලන්ඩ් හොස්පිටැලිටි ලිමිටඩ් වෙත කැසිනෝ ව්‍යාපාර බලපත්‍රයක් ලබා දී ඇති බව එහි සඳහන් වේ.

මෙම ව්‍යාපාරය තවදුරටත් ශක්තිමත් කරමින් 1978 අංක 4 දරන ශ්‍රී ලංකා ආයෝජන මණ්ඩල නීතියේ 17(2) වගන්තිය යටතේ 2024 අගෝස්තු 1 වැනි දින ශ්‍රී ලංකා ආයෝජන මණ්ඩලය සමඟ ගිවිසුමක් ද අත්සන් කර ඇත.

වසර 15 කට වැඩි කාලයක්, Majestic Group Hotels and Casinos ගෝවා හි සුඛෝපභෝගී සහ විනෝදාස්වාදයේ මූලික කේන්ද්‍රස්ථානයක් වී ඇති අතර, ඉන්දියාව පුරා සංචාරකයන් ආකර්ෂණය කර ගත් බව සමාගම අගෝස්තු මාසයේදී නිකුත් කළ ප්‍රකාශයේ සඳහන් වේ.