September 28, 2024
හිටපු ජනාධිපතිවරුන්ගේ ප්‍රතිලාභ කප්පාදු කිරීමේදී ඇතැම් කප්පාදු කිරීම් සඳහා මීළඟ පාර්ලිමේන්තුවේදී නීතිමය සංශෝධන අවශ්‍ය වන බැවින්, නිර්ණායකයකට අනුව කප්පාදු කිරීම සඳහා ඒවා සමාලෝචනය කිරීමට රජය කටයුතු කර ඇති බව ඉහළ පෙළේ ආරංචි මාර්ග පවසයි.
ජනාධිපති අනුර කුමාර දිසානායක සිය මැතිවරණ ව්‍යාපාරයේදී හිටපු ජනාධිපතිවරුන්ගේ විශ්‍රාම වැටුප් ප්‍රතිලාභ ඇතුළු ප්‍රතිලාභ අහෝසි කරන බවට ප්‍රතිඥා ලබාදුන්නේය.
හිටපු ජනාධිපතිවරුන් සඳහා වන ප්‍රතිලාභ තීරණය වන්නේ 1986 අංක 4 දරන ජනාධිපති හිමිකම් පනතේ විධිවිධාන අනුව ය.
නීතියට අනුව, සෑම හිටපු ජනාධිපතිවරයකුටම ඔහුගේ හෝ ඇයගේ ජීවිත කාලය තුළ, සුදුසු නිවසක් කුලියට නොගෙන භාවිත කිරීමට අයිතියක් ඇත.
සුදුසු වාසස්ථානයක් ලබානොදෙන්නේ නම්, මාසික විශ්‍රාම වැටුපින් තුනෙන් එකකට සමාන මාසික දීමනාවක් ගෙවිය යුතුය.
සෑම හිටපු ජනාධිපතිවරයකුටම ජනාධිපති පෞද්ගලික ලේකම් ධූරය දරන පුද්ගලයාට මාසික වැටුපට සමාන මාසික දීමනාවක් ගෙවිය යුතුය.
හිටපු ජනාධිපතිවරයකුගේ වැන්දඹු බිරිඳක් සඳහා කැබිනට් අමාත්‍යවරයකුගේ පෞද්ගලික ලේකම් ධූරය දරන පුද්ගලයාට ගෙවිය යුතු මාසික වැටුපට සමාන මාසික දීමනාවක් ගෙවිය යුතුය.
මේ වන විට කැබිනට් අමාත්‍යවරයෙකුට ලබා දෙන නිල ප්‍රවාහන පහසුකම් සහ අනෙකුත් සියලුම පහසුකම් ඔවුන්ට ද හිමි වේ.
ඊට අමතරව ඒකාබද්ධ අරමුදලින් විශ්‍රාම වැටුපක් ගෙවනු ලැබේ.
මෙම සියලු ප්‍රතිලාභ සමාලෝචනය කර, මැතිවරණ පොරොන්දුව අනුව ඒවා කප්පාදු කිරීම සඳහා වන නිර්ණායකයක් රජය විසින් සකස් කරනු ඇති බව ජනාධිපතිවරයාට සමීපතම ආරංචි මාර්ග සඳහන් කළේය.
ලබන සඳුදා පැවැත්වීමට නියමිත මීළඟ අමාත්‍ය මණ්ඩල රැස්වීමේදී මේ සම්බන්ධයෙන් සාකච්ඡා කිරීමට නියමිත වේ.
