ඉන්ධන සඳහා පනවා ඇති බද්ද ඉවත් කරන බවට දුන් පොරොන්දුව ඉටු කරන ලෙස හිටපු විදුලිබල හා බලශක්ති ඇමැති කංචන විජේසේකර රජයෙන් ඉල්ලා සිටියි.

එමඟින් ඉන්ධන මිල සැළකිව යුතු ලෙස අඩුවනු ඇතැයි ද ඔහු පවසයි.

“ඔවුන් මැතිවරණ රැස්වීම්වලදී කියා සිටියේ ලීටරයකට 150/- ක් පමණ වන ඉන්ධන සඳහා වන බද්ද ඉවත් කරන බවයි. දැනට පවතින නීතිමය ප්‍රතිපාදන අනුව ඉන්ධන මිල සංශෝධනය 30 වැනිදා රාත්‍රිය වන විට සිදුවිය යුතුයි. ඔවුන් පොරොන්දු වූ පරිදි බදු ඉවත් කළ හැකි නම් ඩීසල් ලීටරයක් ​​රු. 100කට පමණ දිය හැකියි” යනුවෙන් ඔහු සඳහන් කරයි.

මැතිවරණ කොමිෂන් සභාවේ නියෝගයක් මත අත්හිටුවා තිබූ පසුගිය රජය විසින් අනුමත කරන ලද සහන වැඩපිළිවෙළ ජනාධිපතිවරණයට අදාළව අඛණ්ඩව ක්‍රියාත්මක කිරීම පිළිබඳව ද හිටපු අමාත්‍යවරයා රජයට ස්තූතිය පළකරයි.

“ලංකා විදුලිබල මණ්ඩලයේ නිලධාරීන් විසින් සකස් කර තිබූ විදුලි මිල සංශෝධනයක් ඔක්තෝම්බර් මාසය සඳහා සැලසුම් කර තිබෙනවා. මෙය ප්‍රමාදයකින් තොරව මහජන උපයෝගිතා කොමිසමේ අනුමැතිය සඳහා යවන ලෙස අපි රජයෙන් ඉල්ලා සිටිනවා” යනුවෙන් ද හිටපු අමාත්‍ය කංචන විජේසේකර වැඩිදුරටත් පවසයි.