42.31%
17.27%
32.76%
September 24, 2024
යුද ගැටුම් සමයේ සාම නියෝජිතයකු, හිටපු රාජ්‍ය තාන්ත්‍රිකයකු සහ හිටපු ජනාධිපති රනිල් වික්‍රමසිංහගේ උපදේශක ලෙස කටයුතු කළ එරික් සෝල්හයිම් 2024 ජනාධිපතිවරණ ප්‍රතිඵලය ‘දේශපාලන භූමිකම්පාවක්’ ලෙස අර්ථ දක්වා තිබේ.
“මේ සති අන්තයේ ශ්‍රී ලංකාවේ ජනාධිපතිවරයා ලෙස වාමාංශික අපේක්ෂක අනුර කුමාර දිසානායක තේරී පත් විය. නිදහසින් පසු ශ්‍රී ලාංකේය ජනතාව සාම්ප්‍රදායික ප්‍රභූ පැලැන්තියෙන් පරිබාහිර පක්ෂයක් සහ අපේක්ෂකයකු තෝරා ගන්නා පළමු අවස්ථාව මෙයයි,” යනුවෙන් ඔහු ඊයේ ‘X’ සමාජ මාධ්‍ය වේදිකාවේ සටහනක් හරහා සඳහන් කළේය.
මෙම පෙර නොවූ විරූ ජයග්‍රහණයෙන් පිළිබිඹු වන්නේ රටේ ආර්ථික අර්බුදයේදී අඩු වරප්‍රසාද ලත් ශ්‍රී ලාංකිකයන් තුළ ඇති වූ පුළුල් අතෘප්තිය මෙන්ම අනුර කුමාර දිසානායකගේ දූෂණ විරෝධී ස්ථාවරය සහ එය වැඩි දියුණු කිරීම සඳහා පෙනී සිටීම සඳහා වූ මහජන සහයෝගය බව සෝල්හයිම් සඳහන් කර තිබේ.
“දිසානායක නොහොත් AKDගේ පක්ෂය හෝ සන්ධානය අතීතයේ කිසි දිනෙක බලයට සමීප වී නැත. එහි ප්‍රතිඵලය ආර්ථික අර්බුදයේදී ශ්‍රී ලාංකිකයන් තුළ ඇති වූ වේදනාව පිළිබඳ සාක්ෂියකි. දූෂණයට එරෙහි AKDගේ සටන සහ ජනතාව සඳහා වැඩි සුභසාධනයක් සඳහා ඔහු කරන කැඳවීම ගැන පුළුල් අනුකම්පාවක් පැවතිණි, ”යනුවෙන් ඔහු වැඩිදුරටත් පැවසීය.
කෙසේවෙතත්, අලුතින් තේරී පත් වූ ජනාධිපතිවරයා ඉදිරියේ ඇති අභියෝග සෝල්හයිම් ඉස්මතු කළේය.
“මැතිවරණ ජයග්‍රාහකයාගේ දුර්වලකම නම් ඔහුගේ සන්ධානයට ශ්‍රී ලංකාව වැනි සංකීර්ණ රාජ්‍යයක් පවත්වාගෙන යෑමේ අත්දැකීම් ඉතා අල්පවීමයි. වඩාත් අභියෝගාත්මක ආර්ථික පරිසරයක් තුළ ඔවුන්ගේ බොහෝ පොරොන්දු ක්‍රියාත්මක කිරීමට ද ඔවුන් අරගල කරනු ඇත,” යනුවෙන් ඔහු ප්‍රකාශ කළේය.
අනුර කුමාර දිසානායකගේ කඳවුර පාර්ලිමේන්තුවේ බහුතරයක් ලබා ගැනීමට අරගල කළ හැකි බවට ද ඔහු යෝජනා කළේය.
“මෙම මැතිවරණය බොහෝ විදේශීය අගනගරවල ඇහිබැම ඉහළ නංවනු නිසැකය. රාජ්‍ය තාන්ත්‍රිකයන් දෙවරක් සිතිය යුතුයි. AKD ඔහුගේ මැතිවරණ ව්‍යාපාරය අතරතුර ඉන්දියාව, චීනය සහ බටහිර රටවලට ළඟා වී ඇත. ඔහුට සාර්ථක නායකයකු වීමට අප සැවොම ප්‍රතිඋපකාර කළ යුතුය. වඩාත් සමෘද්ධිමත්, සාමකාමී සහ හරිත ශ්‍රී ලංකාවක් සෑම දෙනාගේම උනන්දුවකි. ඒ ගමනට AKDට උදව් ලැබිය යුතුයි,” යනුවෙන් ඔහු පැවසීය.
මැතිවරණයේ සාමකාමී ස්වභාවය සම්බන්ධයෙන් සෝල්හයිම් ප්‍රශංසා කළ අතර, මැතිවරණ ව්‍යාපාරය තුළ ස්වෝත්තමවාදය සහ වාර්ගික අන්තවාදය කිසිදු කාර්යභාරයක් ඉටු නොකළ පළමු අවස්ථාව මෙය බව ද සඳහන් කළේය.
මැතිවරණයේ සාමකාමී බව සහ සජිත් ප්‍රේමදාස සහ රනිල් වික්‍රමසිංහ ප්‍රධාන පරාජිත අපේක්ෂකයන් ජයග්‍රාහකයා වෙත දැක්වූ කරුණාවෙන් බොහෝ බටහිර ජාතීන්ට පාඩම් ඉගෙන ගත හැකි බව ඔහු පෙන්වා දුන්නේය.
වික්‍රමසිංහගේ ධුර කාලය ගැන ආවර්ජනය කරමින්, පෙර නොවූ විරූ ආර්ථික අර්බුදයක් මධ්‍යයේ ශ්‍රී ලංකාවේ ස්ථාවරත්වය ප්‍රතිෂ්ඨාපනය කිරීම සම්බන්ධයෙන් සෝල්හයිම් ඔහුට ගෞරවය පුද කර ඇත.
“සර්වකාලීන ආර්ථික කඩාවැටීම් මධ්‍යයේ ශ්‍රී ලංකාව සාමාන්‍ය තත්ත්වයට පත් කළ පුද්ගලයා ලෙස වික්‍රමසිංහ ඉතිහාසයට එක්වනු ඇත. අන්තර්ජාතික මූල්‍ය අරමුදලේ වැඩසටහනක් ක්‍රියාවට නැංවීමේ පදනම මත ලෝක ඉතිහාසයේ කිසිඳු නායකයකු නැවත තේරී පත්වී නොමැති තරම්ය. අපි රනිල්ගෙන් තවත් දේ බලා සිටිමු” යනුවෙන් සෝල්හයිම් වැඩිදුරටත් සඳහන් කර තිබේ.
