2024 ස්වර්ණ පුස්තක සම්මාන උළෙලේ දී වසරේ හොඳම නවකතාවට හිමි ස්වර්ණ පුස්තක සම්මානය විරාජිනි තෙන්නකෝන්ගේ කැමෙලියා කෘතියට හිමිවිය.

ශ්‍රී ලංකා පොත් ප්‍රකාශකයන්ගේ සංගමය 16 වැනි වරටත් සංවිධානය කළ මෙම උත්සවය ඊයේ(14)සවස කොළඹ බණ්ඩාරනායක අනුස්මරණ අන්තර්ජාතික සම්මන්ත්‍රණ ශාලාවේදී පැවැත්විණි.

අදාළ සම්මානය සමඟ විරාජිනි තෙන්නකෝන්ට මුදලින් රුපියල් ලක්ෂ අටහමාරක මුදල් ත්‍යාගයක් ද පිරිනැමිණි.

මෙහිදී අවසන් වටයට නිර්දේශ වූ මහින්ද ප්‍රසාද් මස්ඉඹුලගේ මැයි මාර ප්‍රසංගය, එරික් ඉලයප්ආරච්චිගේ තිවංක කතාව, මලිත් තුසිත ගුණරත්නගේ සිල්වර් ටිප්ස්, ලියනගේ අමරකීර්තිගේ කැළලිකාරයෝ යන නවකතා සඳහා රුපියල් ලක්ෂය බැගින් වන ත්‍යාග මුදල් සමඟ සහතිකපත් පිරිනැමිණි.

මෙම නවකතා ප්‍රකාශයට පත්කළ සරසවි, සන්ථව, ගොඩගේ, විදර්ශන සහ සූරිය යන ප්‍රකාශන ආයතනවලට ඇගයීමේ සම්මාන ප්‍රදානය කෙරිණි.

සම්මාන ප්‍රදානය හිටපු මහා කොමසාරිස්වරයකු වන මහාචාර්ය සසංක පෙරේරා සමග ශ්‍රී ලංකා පොත් ප්‍රකාශකයන් සංගමයේ හිටපු සභාපතිවරු අතින් සිදුකෙරිණි.

(ලංකාදීප)