බණ්ඩාරනායක අන්තර්ජාතික ගුවන් තොටුපොළේ ශ්‍රී ලංකා රේගු මත්ද්‍රව්‍ය පාලන ඒකකයේ නිලධාරීන් විසින් රුපියල් මිලියන 75ක් පමණ වටිනා කොකේන් කිලෝග්‍රෑම් 2.14ක් අත්අඩංගුවට ගෙන තිබේ.

කොලොම්බියාවේ බොගෝටා සිට ගණේමුල්ල ප්‍රදේශයේ ලිපිනයකට ගුවන් භාණ්ඩ මගින් එවන ලද පාර්සලයක් තුළ විදුලි උපකරණයක් තුළ මෙම කොකේන් සඟවා තිබී ඇත.

සිද්ධියට සම්බන්ධ බවට සැකපිට මාලිගාවත්ත ප්‍රදේශයේ පදිංචි 23 සහ 24 හැවිරිදි පුද්ගලයන් දෙදෙනකු මෙන්ම භාණ්ඩ නිෂ්කාශනය කිරීමේ නියෝජිතයකු ද අත්අඩංගුවට ගෙන තිබේ.

කොකේන් තොගයේ ඇස්තමේන්තුගත වීදි වටිනාකම රු.මිලියන 75ක් බව පැවැසේ.

අත්අඩංගුවට ගත් කොකේන් සහ අත්අඩංගුවට ගත් සැකකරුවන් වැඩිදුර විමර්ශන සඳහා පොලිස් මත්ද්‍රව්‍ය නාශක කාර්යාංශයට භාරදීමට නියමිතය.