හිටපු ජනාධිපති මහින්ද රාජපක්ෂගේ 2005 මැතිවරණයට අදාළ අවසන් පෝස්ටරය මුද්‍රණය කිරීමටවත් ඔවුන්ට මුදල් නොතිබූ බවත් ඔහුගේ අවසන් පෝස්ටරය ජනතා විමුක්ති පෙරමුණ විසින් මුද්‍රණය කර ඇත්තේ ණයට බවත් එවන් පසුබිමක ඔවුන් මේ වන විට විශාල ධනයක් උපයාගෙන සිටින්නේ කෙසේදැයි ජාතික ජන බලවේගයේ නායක අනුර කුමාර දිසානායක ප්‍රශ්න කරයි.

තඹුත්තේගම ප්‍රදේශයේ පැවති ජන හමුවකට එක්වෙමින් ඔහු කියා සිටියේ බැසිල් රාජපක්ෂ විසින් මෙතෙක් එම මුදල් පියවා නොමැති බවයි.

ලොව පුරා නිවාස මිලදී ගැනීමටත්, රට පුරා ඉඩම් මිලදී ගැනීමටත්, කොළඹ මන්දිර ඉදිකරන්නටත් දැන් ඔවුන් මහා පරිමාණයෙන් ධනය රැස්කරගෙන සිටින්නේ කෙසේදැයි අනුර කුමාර දිසානායක ප්‍රශ්න කළේය.

දේශපාලනඥයන් ධනය රැස් කරන්නේ ජනතාව මර්දනය කරමින් බවත් මෙම දේශපාලන සංස්කෘතියට ජාතික ජන බලවේගය තිත තබන බවත් ඔහු පැවසීය.

ජනතා විමුක්ති පෙරමුණු හෝ ජාතික ජන බලවේගය කිසිවෙක් දේශපාලනයෙන් මහජන මුදල් සතයක්වත් අවභාවිත කර හෝ මුදල් හෝ ධනයක් උපයා නොමැති බවද දිසානායක මහතා පැවසීය.

“අපි බලයට ආවට පස්සේ අපේ සියලු වරප්‍රසාද අත්හැරීමට සූදානම්, දේශපාලනඥයන් නඩත්තු කිරීමට මහජන මුදල් වැය කළ යුතු නැහැ. මහජන මුදල් වියදම් කරලා දේශපාලනඥයන්ගේ වාහන බලපත්‍ර, නිවාස, විදුලිය, ජල බිල්පත් ගෙවන්නේ නැහැ. බුද්ධි අංශ වාර්තා අනුව දේශපාලකයන්ට තර්ජන ඇත්නම් පමණක් ආරක්ෂාව ලබා දෙනවා” යනුවෙන් ඔහු පැවසීය.