September 5, 2024
මෙරට මනරම් ස්ථානවල රියැලිටි වැඩසටහනක් රූගත කිරීම සඳහා දකුණු කොරියානු JTBC ජනමාධ්‍ය සමූහයේ කණ්ඩායමක් ශ්‍රී ලංකාවට පැමිණ තිබේ.
ශ්‍රී ලංකා සංචාරක ප්‍රවර්ධන කාර්යාංශය සහ සෝල් නුවර ශ්‍රී ලංකා තානාපති කාර්යාලය සමඟ සහයෝගයෙන් මෙම සංචාරය සංවිධාන කර තිබේ.
ඒ අනුව පැමිණ සිටින 8 දෙනෙකුගෙන් යුතු කණ්ඩායම මෙරට ප්‍රධාන ආකර්ෂණ ස්ථාන, සංස්කෘතිය සහ ආහාර වර්ග ප්‍රවර්ධනය කරනු ඇත.
ජනප්‍රිය කොරියානු කීර්තිමත් පුද්ගලයකු නව ගමනාන්තයක් වෙත ප්‍රේක්ෂකයන් රැගෙන යන නව රියැලිටි වැඩසටහනක් වන ‘Extreme Tour’ සඳහා ඔවුන් දිවයිනේ දර්ශනීය ඡායාරූප ලබා ගනු ඇති බව වාර්තා වේ.
ඒ අනුව පිදුරංගල, දඹුල්ල, මහනුවර දළදා මාලිගාව, හපුතලේ සහ මාදු ගඟ රූගත කිරීම් ස්ථානවලට ඇතුළත් විය.
JTBC මාධ්‍ය කණ්ඩායම පවසා ඇත්තේ සාර්ථක වාර්තා චිත්‍රපටයක් නිර්මාණය කිරීම සඳහා ශ්‍රී ලංකාවේ සුන්දර දසුන් කිහිපයක් ග්‍රහණය කර ගැනීමට හැකි වූ බවයි.
JTBC මාධ්‍ය සමූහයේ සහ ශ්‍රී ලංකා සංචාරක ප්‍රවර්ධන කාර්යාංශයේ මෙම ප්‍රවර්ධන ප්‍රයත්නය ලොව පුරා සංචාරක ගමනාන්තයක් ලෙස ශ්‍රී ලංකාවේ සුවිශේෂත්වය ප්‍රකාශ කරන අතර තවත් කොරියානු සංචාරකයන් මෙරටට ආකර්ෂණය කර ගැනීමට හැකි වනු ඇති බවට විශ්වාස කෙරේ.
