2010 වසරේ බදුල්ල – කඳගොල්ල ප්‍රදේශයේදී සිය බිරිඳට යකඩ පොල්ලකින් පහරදී ඝාතනය කළ බවට චෝදනා ලැබ සිටි පුද්ගලයකුට ඌව පළාත්බද මහාධිකරණය විසින් මරණ දඬුවම නියම කර තිබේ.

2010 ජූනි 19 වැනිදා තම බිරිඳ ඝාතනය කළ බවට සැමියාට චෝදනා කරමින් බදුල්ල පොලිසිය අධිකරණයේ නඩු පවරා තිබිණි.

මෙම අඹුසැමි යුවළ දීර්ඝ කාලයක සිට පවුල් ආරවුලක සිට ඇති බව විමර්ශනවලදී අනාවරණය වී ඇත.

ඇය ප්‍රේම සම්බන්ධයක් පවත්වාගෙන යන බව තහවුරු කර ගැනීමෙන් පසු ඔවුන් අතර බහින්බස් වීමක් සිදුවී ඇති අතර එහිදී එම පුද්ගලයා කාන්තාවට යකඩ පොල්ලකින් පහරදී තිබේ.

ප්‍රහාරයෙන් පසු ප්‍රදේශවාසීන් විසින් ඇය කඳගොල්ල රෝහලට ඇතුළත් කර ඇති අතර, ඉන් අනතුරුව බදුල්ල රෝහලට මාරුකර යවා තිබුණ ද එහිදී ඇය මිය ගොස් ඇත.

අධිකරණ වෛද්‍ය නිලධාරීවරයාගේ වාර්තාවෙන් තහවුරු වී තිබුණේ අභ්‍යන්තර රුධිර වහනයක් හේතුවෙන් කාන්තාව මියගොස් ඇති බවයි.

නඩුවේ තීන්දුව ප්‍රකාශයට පත් කරමින් ඌව පළාත්බද මහාධිකරණය කියා සිටියේ විත්තිකරුට එරෙහි සියලු චෝදනා ඔප්පු වී ඇති බැවින් සැකකරුට මරණ දඬුවම නියම කළ බවයි.