පළාත් පාලන මැතිවරණය පැවැත්විය හැක්කේ ජනාධිපතිවරණය අවසන් වීමෙන් පසුව පමණක් බව මැතිවරණ කොමිසම ප්‍රකාශ කර තිබේ.

හැකි ඉක්මණින් පළාත් පාලන මැතිවරණය පැවැත්විය යුතු බවට ශ්‍රේෂ්ඨාධිකරණය පසුගියදා නියෝගය කළේය.

තමන් අනෙකුත් කොමසාරිස්වරුන් සමඟ එක්ව එම අධිකරණ තීන්දුව ලබන සතියේ පැවැත්වීමට නියමිත රැස්වීමේදී සළකා බැලීමට කටයුතු කරන බව මැතිවරණ කොමිසමේ සභාපති ආර්.එම්.එල්.ඒ.රත්නායක ප්‍රකාශ කර තිබේ.

කෙසේවෙතත්, සැලසුම් සහ සංවිධානය වීමේ ගැටලු හේතුවෙන් ජනාධිපතිවරණය සහ පළාත් පාලන මැතිවරණය එකවර පැවැත්වීමට කොමිසමට හැකියාවක් නොමැති බව ඔහු පෙන්වා දී තිබේ.

සභාපතිවරයා පවසන්නේ ලබන බදාදා පැවැත්වෙන රැස්වීමේදී තීරණයක් ගැනීමට සුදානම් බවයි.

මැතිවරණ කොමිෂන් සභාව, නීතිපතිවරයා සහ මුදල් ඇමැතිවරයා ලෙස ජනාධිපති රනිල් වික්‍රමසිංහගේ ක්‍රියා සහ අතපසුවීම්, ඔවුන්ගේ අත්තනෝමතික සහ නීති විරෝධී හැසිරීම් හේතුවෙන් ව්‍යවස්ථාව යටතේ සහතික කර ඇති මූලික අයිතිවාසිකම් උල්ලංඝනය වී ඇති බව ශ්‍රේෂ්ඨාධිකරණය සිය තීන්දුවෙන් ප්‍රකාශ කර තිබිණි.

එම ක්‍රියාවන් 2023 පළාත් පාලන මැතිවරණය නොපැවැත්වීමට හේතු වී තිබිණි.

මුදල් ඇමැතිවරයා වන ජනාධිපතිවරයා, මැතිවරණ කොමිෂන් සභාව සහ නීතිපතිවරයා ආණ්ඩුක්‍රම ව්‍යවස්ථාවේ 12(1)- (සමානාත්මතාවයේ අයිතිය) සහ 14(1)(අ)- (අදහස් ප්‍රකාශ කිරීමේ නිදහස) යටතේ සහතික කර ඇති මූලික අයිතිවාසිකම් කඩ කර ඇති බව ශ්‍රේෂ්ඨාධිකරණය තීන්දු කර තිබිණි.