මියන්මාර වහල් කඳවුරුවල තවදුරටත් සිරවී සිටින සිසුන් 34 දෙනා මුදා ගැනීම සඳහා ශ්‍රී ලංකා රජය සිය ප්‍රයත්නයන් වේගවත් කර ඇති බව විදේශ කටයුතු රාජ්‍ය ඇමැති තාරක බාලසූරිය පවසයි.

මියන්මාර වහල් කඳවුරුවල සිරවී සිටි සිසුන් 20 දෙනෙකු සාර්ථකව මෙරටට ගෙන්වා ගැනීමෙන් අනතුරුව විදේශ කටයුතු අමාත්‍යාංශයේ පැවති මාධ්‍ය හමුවකට එක්වෙමින් ඔහු මේ බව සඳහන් කළේය.

එහිදී රාජ්‍ය ඇමැති බාලසූරිය අවධාරණය කළේ සිසුන් 20 දෙනා බේරා ගැනීම සුවිශේෂී ජයග්‍රහණයක් වුවද, ඉතිරි 34 දෙනා නිදහස් කර ගැනීම කෙරෙහි දැන් අවධානය යොමු වී ඇති බවයි.

දැනට පවතින ප්‍රශ්නය පිළිබඳ කණස්සල්ල පළ කළ ඔහු නිල නොවන මාර්ග හරහා මියන්මාරයේ රැකියා සඳහා යෑම අධෛර්යමත් කිරීමෙන් අනාගතයේ මෙවැනි සිදුවීම් වළක්වා ගැනීමේ වැදගත්කම අවධාරණය කළේය.

පසුගියදා තවත් සිසුන් පස් දෙනෙකු ඩුබායි හරහා මියන්මාරයට ගොස් ඇති බව දැනගන්නට ඇතැයි ද ඔහු පැවසීය.

දැනට සිරවී සිටින පිරිස ගලවා ගැනීමේ ක්‍රියාවලිය කඩිනම් කිරීම සඳහා රජය තුන්වැනි පාර්ශ්ව මැදිහත්වීම් සහ රාජ්‍යතාන්ත්‍රික නාලිකා ඇතුළු විවිධ මාර්ග ගවේෂණය කරමින් සිටින බව ද රාජ්‍ය ඇමැති බාලසූරිය සඳහන් කළේය.