රිමාන්ඩ් බන්ධනාගාරගත කරනු ලැබ සිටින, හිටපු සෞඛ්‍ය ඇමැති කෙහෙළිය රඹුක්වැල්ල සහ රිය අනතුරකින් මියගිය, හිටපු රාජ්‍ය ඇමැති සනත් නිශාන්ත යන අයට ඇමැතිවරුන් ලෙස පාවිච්චි කළ කොළඹ නිල නිවාස දෙක තවදුරටත්, ඔවුන්ගේ පවුල්වල ඥාතීන්ට පාවිච්චි කිරීමට රජය අවසර දී ඇතැයි, රාජ්‍ය පරිපාලන අමාත්‍යාංශ ආරංචි මාර්ග සදහන් කරයි.

මේ අනුව, එම දෙදෙනාගේ පවුල්වල සාමාජිකයෝ ඒ නිල නිවාසවල තවමත් රැඳීසිටිති.

බාල බෙහෙත් චෝදනා සම්බන්ධයෙන් කෙහෙළිය රඹුක්වැල්ල පසුගිය පෙබරවාරි මාසයේ සිට රිමාන්ඩ් බන්ධනාගාරගත කරනු ලැබ සිටී.

හිටපු රාජ්‍ය ඇමැති සනත් නිශාන්ත කටුනායක කොළඹ අධිවේගි මාර්ගයේදී සිදු වූ රිය අනතුරකින් මරුමුවට පත්වූයේ පසුගිය ජනවාරි 25 වැනිදාය.

මේ අතර, හිටපු ඇමැතිවරුන් පහකට ආසන්න පිරිසක් තවමත් ඇමැති නිල නිවාසවල රැඳී සිටින බව එම ආරංචි මාර්ග සඳහන් කරයි.

එසේම, හිටපු විපක්ෂ නායක, අභාවප්‍රාප්ත ආර්. සම්බන්ධන් පාවිච්චි කළ කොළඹ 7, මහගමසේකර මාවතේ බී 12 නිල නිවෙස ඔහු මියගොස් මාසයකට වැඩි කාලයක් ගත වී ඇතත්, තවමත් රජයට බාර දී නැතැයි, රාජ්‍ය පරිපාලන අමාත්‍යාංශ ආරංචි මාර්ගවලින් පැවැසේ.

සම්බන්ධන් විපක්ෂ නායකවරයා ලෙස සිටියදී ඔහුට ලබා දී තිබූ මෙම නිල නිවෙස, ඔහු ද්‍රවිඩ ජාතික සන්ධානයේ නායකයා ලෙස සිටිනතාක් පාවිච්චි කිරිමට 2019 වර්ෂයේදී එවකට කැබිනට් මණ්ඩලය අනුමැතිය දුන්නේය.

ඒ අනුව, ඔහුට මියයන තුරුම එම නිල නිවෙසේ ජිවත් වීමට අවස්ථාව සැලසිණි.

සම්බන්ධන් පාවිච්චි කළ මෙම නිල නිවෙස නැවත ලබාගැනීමට කැබිනට් මණ්ඩලයට පසුගිය දා සිහිකැඳවීමක් කළ බව, රාජ්‍ය පරිපාලන අමාත්‍යාංශයේ ප්‍රකාශකයෙක් පවසයි.

කොළඹ හතේ අක්කර එක හමාරක පමණ භූමි භාගයක මෙම නිල නිවෙස පිහිටා ඇත.

එහි නඩත්තු කටයුතු සඳහා බංගලා භාරකරුවකු, උද්‍යානකරුවන් දෙදෙනකු, අභ්‍යන්තර නඩත්තු කම්කරුවන් දෙදෙනකු වශයෙන් සේවකයෝ පස්දෙනකු යොදවනු ලැබ සිටියි.

ඔවුන්ට වැටුප් ගෙවීම හා නිල නිවෙස නඩත්තුව රජය විසින් සිදුකරනු ලැබේ.(ලංකාදීප)