August 10, 2024
හරීන් ප්‍රනාන්දු සහ මනූෂ නානායක්කාර සමගි ජන බලවේගයෙන් නෙරපා හැරීමේ තීරණය නීත්‍යනුකූල බව ශ්‍රේෂ්ඨාධිකරණය තීරණය කිරීමෙන් මොහොතකට පසු ජනාධිපති රනිල් වික්‍රමසිංහ ඊයේ පෙරවරුවේ ඔවුන් දෙදෙනා හමුවී තිබේ.
එහිදී ඔවුන් දෙදෙනාගේ සහයෝගයට ස්තූතිය පළ කළ ජනාධිපතිවරයා ‘බය වෙන්න එපා’ යනුවෙන් ඔවුන්ට දැනුම් දී ඇති බව වාර්තා වේ.
සජිත් ප්‍රේමදාස අත්හැර රටට වඩාත්ම අවශ්‍ය මොහොතක රට වෙනුවෙන් වැඩ කිරීමට තීරණය කළ බැවින් තමන් ‘ඔළුව කෙලින් තියන්’ ඉවත්ව යන බව තීන්දුව ලැබුණු විගස මන්ත්‍රී ධුර අහිමිව ඇමැති ධුරවලින් ඉවත්වීමට සිදුවූ හිටපු ඇමැතිවරුන් දෙදෙනා ජනාධිපතිවරයාට දැනුම්දී තිබේ.
ඔවුන් දෙදෙනාට ඇමැතිධුරවලින් ඉවත්වීමට සිදුවීම සම්බන්ධයෙන් දැඩි කලකිරීමට පත්ව සිටින බවත් ඔවුන් වෙහෙස මහන්සි වී වැඩ කිරීම අගය කරන බවත් තමන් සමඟ රැඳී සිටින ලෙස ඔවුන්ගෙන් ඉල්ලා සිටින බවත් ජනාධිපතිවරයා එහිදී පවසා ඇත.
ඔවුන් දෙදෙනාම ජනාධිපතිවරයා සමඟ සිටිමින් ඔහුගේ මැතිවරණ ව්‍යාපාරයට සම්බන්ධ වීමට පොරොන්දු වී ඇත.
“ජනාධිපතිතුමා මට එතුමාගේ රැලි 100ක් මෙහෙයවීමේ කාර්යය භාර දීලා තියෙනවා. ඒ නිසා මම ඒකට සම්පූර්ණයෙන්ම සම්බන්ධ වෙනවා. එතුමා දිනුවොත් මම ආසනයකට තරග කරනවද කියලා මම පසුව තීරණය කරනවා,” යනුවෙන් හරීන් ප්‍රනාන්දු පවසා ඇත.
මනූෂ නානායක්කාර ද ජනාධිපතිවරයාගේ ප්‍රචාරක ව්‍යාපාරයට සම්බන්ධ වීමට නියමිතය.
හරීන් සහ මනූෂ පාර්ලිමේන්තු මන්ත්‍රී ධුරවලින් නෙරපා හැරීමෙන් පසු සංචාරක, තරුණ හා ක්‍රීඩා අමාත්‍යාංශ ජනාධිපතිවරයා යටතට පත්වන බව වාර්තා වේ.
ඉඩම් සහ විදේශ රැකියා අමාත්‍යාංශ අගමැති දිනේෂ් ගුණවර්ධනගේ විෂය පථයට යටත් කෙරෙනු ඇත.
කෙසේවෙතත් සංචාරක ව්‍යාපාරයේ උච්චතම අවස්ථාව හේතුවෙන් සංචාරක රාජ්‍ය ඇමැතිවරයකු කඩිනමින් දිවුරුම් දීමට නියමිත බව ද වාර්තා වේ.
