2024 ජූලි මස ICC කාන්තා ක්‍රීඩිකාව සඳහා නම්කර සිටින ක්‍රීඩිකාවන් තිදෙනා අතරට ශ්‍රී ලංකා ක්‍රීඩිකා චමරි අතපත්තු ද ඇතුළත්ව සිටී.

සෙසු දෙදෙනා වන්නේ ස්ම්‍රීති මන්දනා සහ ෂෆාලි වර්මා යන ඉන්දියානු ක්‍රීඩිකාවන්ය.

චමරි අතපත්තු හත් වරක් ශූරියන් වූ ඉන්දියාවට එරෙහිව ජූලි මාසයේදී 2024 කාන්තා ආසියානු කුසලානයේ ඓතිහාසික මංගල ජයග්‍රහණයක් සමඟින් ඇගේ කිරුළට තවත් වටිනාකමක් එක්කර ගත්තාය.

මෙම ජයග්‍රහණය පසුගිය මාස 12 තුළ ඇයගේ නායකත්වය යටතේ සටහන් වූ තවත් ජයග්‍රහණයකි.

ඇගේ නායකත්වය යටතේ ශ්‍රී ලංකාව එංගලන්තයට සහ දකුණු අප්‍රිකාවට එරෙහිව පළමු T20 තරඟාවලි ජයග්‍රහණ සහ 2024 ICC කාන්තා T20 ලෝක කුසලානය සඳහා සුදුසුකම් ලබා ගැනීම ඇතුළු සන්ධිස්ථාන කිහිපයක් පිහිටුවා තිබේ.

දැනට වසර කිහිපයක සිට ශ්‍රී ලංකා පිතිකරණයේ කොඳු නාරටිය වූ අතපත්තු අපරාජිත ආසියානු කුසලාන ජයග්‍රහණයේ තරුව ද වූවාය.

බංග්ලාදේශයට එරෙහිව ශ්‍රී ලංකාවේ පළමු තරගයේදී ලකුණු 12ක් පමණක් ලබා ගැනීමෙන් පසුව, අතපත්තු මැලේසියාවට එරෙහිව වෘත්තීය ජීවිතයේ හොඳම ලකුණු 119* ලබා ගනිමින් විශිෂ්ට දක්ෂතාවක් පෙන්නුම් කළේය.

අවසන් කණ්ඩායම් අතර තරගයේදී චමරි තායිලන්තයට එරෙහිව නොදැවී ලකුණු 49*ක් ලබා ගත් අතර තරගාවලියේ අවසන් පූර්ව හා අවසන් තරගයේදී පාකිස්ථානයට (63) සහ ඉන්දියාවට (61) එරෙහිව පිට පිට ජයග්‍රාහී අර්ධ ශතක වාර්තා කළාය.

146.85ක අගනා ප්‍රහාරක වේගයක් යටතේ ඇය ලකුණු 304ක් ද ලබාගෙන තිබිණි.

ICC මාසිකව තෝරන ක්‍රීඩිකාව ලෙස දැනටමත් දෙවතාවක් ජයග්‍රහණය කර ඇති අතපත්තුට දැන් තෙවැනි සම්මානයට ද අවස්ථාව හිමිව තිබේ.