ඉන්දියාවේදී පැවති Global Tourism Awards 2024 හි හොඳම අන්තර්ජාතික සංචාරක මණ්ඩලයට හිමි සම්මානය දිනා ගැනීමට ශ්‍රී ලංකා සංචාරක ප්‍රවර්ධන කාර්යාංශය සමත්ව තිබේ.

සම්මාන උලෙළ ඊයේ පැවැත්වුණේ නවදිල්ලි නුවරදීය.

Global Tourism Awards යනු Travel World Online විසින් සංවිධාන කරන වාර්ෂික උත්සවයකි.

එය සංචාරක කර්මාන්තයේ භූ දර්ශනය හැඩගස්වා ධනාත්මක වෙනසක් ඇති කිරීමට විශිෂ්ට දායකත්වයක් ලබා දුන් ආයතනවලට ගෞරව දැක්වීමට සහ සැමරීමට වේදිකාවක් ලෙස සේවය කරයි.

ඉන්දීය දුම්කොළ සමාගමේ හිටපු විධායක අධ්‍යක්ෂ නකුල් ආනන්ද්ගේ ප්‍රධානත්වයෙන් යුත් කීර්තිමත් ජූරි සභාවක් විසින් තෝරා ගන්නා ලද විවිධ කාණ්ඩ සහ ලොව පුරා අයදුම්කරුවන් විශාල සංඛ්‍යාවක් මෙම වසරේ උත්සවය සඳහා තෝරාගෙන තිබිණි.

උත්සවයේ ගෞරවණීය ආරාධිත අමුත්තා ලෙස සහභාගි වූයේ සංචාරක, ඉඩම්, ක්‍රීඩා සහ යෞවන කටයුතු ඇමැති හරීන් ප්‍රනාන්දුය.

එහිදී හොඳම අන්තර්ජාතික සංචාරක මණ්ඩලයට හිමි සම්මානය ශ්‍රී ලංකා සංචාරක ප්‍රවර්ධන කාර්යාංශයේ සභාපති චාලක ගජබාහු වෙත පිරිනමන ලදී.

ශ්‍රී ලංකාවට පැමිණි විවිධ සංචාරක බලපෑම් කරන්නන්ගෙන් පසුගිය කාලයේ ශ්‍රී ලංකා සංචාරක ව්‍යාපාරයට ලැබුණු බොහෝ ඇගයීම් සහ අන්තර්ජාතික පිළිගැනීම් ද මෙම සම්මානය සඳහා හේතු වී තිබේ.

මෙරට සංචාරක ව්‍යාපාරය 2024 ජූලි 31 දක්වා සංචාරකයන් 1,198,059ක් ආකර්ෂණය කරගැනීමට සමත්වී ඇත.

එය 2023 වසරට වඩා 56%ක වැඩිවීමක් වන අතර මෙම වසරේ සංචාරකයන් මිලියන 2.3ක ඉලක්කය සපුරා ගැනීමට ශ්‍රී ලංකා සංචාරක ව්‍යාපාරය බලාපොරොත්තුවෙන් සිටී.