ඉදිරි ජනාධිපතිවරණය සඳහා හැකි ඉක්මනින් ඇප මුදල් තැන්පත් කරන ලෙස මැතිවරණ කොමිෂන් සභාව ජනාධිපති අපේක්ෂකයින්ගෙන් ඉල්ලා සිටී.

ජනමාධ්‍ය වෙත අදහස් දක්වමින් මැතිවරණ කොමිසමේ සභාපති ආර්.එම්.ඒ.එල්. රත්නායක පවසා ඇත්තේ, අවසන් මොහොතේ ඇති විය හැකි ගැටළු වළක්වා ගැනීම සඳහා කළින් මුදල් තැන්පතු ඉදිරිපත් කරන ලෙසයි.

අද වන විට අපේක්ෂකයන් පස්දෙනකු මුදල් තැන්පත් කර ඇත.

ඒ අනුව ස්වාධීන අපේක්ෂකයන් ලෙස රනිල් වික්‍රමසිංහ සහ සරත් කීර්තිරත්න ඇප මුදල් තැන්පත් කර ඇති අතර අභිනව නිවහල් පෙරමුණේ ඕෂල හේරත්, ශ්‍රී ලංකා කම්කරු පක්ෂයෙන් ඒ.එස්.පී ලියනගේ සහ සමගි ජන බලවේගයෙන් සජිත් ප්‍රේමදාස ඇප මුදල් තැන්පත් කළහ.

අගෝස්තු 15 දක්වා නාමයෝජනා භාර ගැනේ.

ජනාධිපතිවරණය සැප්තැම්බර් 21 වැනිදා පවත්වන බව මැතිවරණ කොමිසම නිල වශයෙන් නිවේදනය කළේය.

මේ අතර, පොලිස්පතිවරයා සම්බන්ධයෙන් පවතින ගැටලුව විසඳීම සඳහා මැතිවරණ කොමිසම ඊයේ මහජන ආරක්ෂක අමාත්‍යාංශයේ ලේකම් සහ ජ්‍යෙෂ්ඨ නියෝජ්‍ය පොලිස් පරීක්ෂක අසංග කරවිට කැඳවා තිබිණි.