ග්‍රෑම් 450ක පාන් ගෙඩියක් රුපියල් 130ක ස්ථාවර මිලකට අලෙවි කිරීමට වෙළෙඳුන් අපොහොසත් වුවහොත් ලබන සතියේ සිට පාන් සඳහා පාලන මිලක් පනවන බව පාරිභෝගික කටයුතු පිළිබඳ අධිකාරිය නිවේදනය කරයි.

පාරිභෝගික කටයුතු පිළිබඳ අධිකාරියේ වැටලීම් සහ විශේෂ විමර්ශන දෙපාර්තමේන්තුවේ අධ්‍යක්ෂ සංජය ඉරසිංහ ප්‍රකාශ කළේ පාන් සඳහා වන ස්ථාවර මිලට අනුකූල නොවීම හේතුවෙන් කුඩා වෙළඳසැල් සඳහා රුපියල් 100,000 දක්වා සහ විශාල සමාගම් හෝ බේකරි සඳහා රුපියල් ලක්ෂ 5 සිට මිලියන 5 දක්වා දඩ නියම කළ හැකි බවයි.

ස්ථාවර මිලක් නොමැතිකම සහ පාන්වල නොගැළපෙන බර ගැන පාරිභෝගිකයන් නිතර මැසිවිලි නගන අතර ඊට ප්‍රතිචාර වශයෙන් පාරිභෝගික කටයුතු අධිකාරිය මෙම ගැටලු විසඳීම සඳහා වරින් වර වැටලීම් සිදු කරයි.

පෙබරවාරි 02 වැනි දින පාරිභෝගික කටයුතු පිළිබඳ අධිකාරිය විසින් ගැසට් නිවේදනයක් නිකුත් කරමින් පාන් ගෙඩියක අවම බර ග්‍රෑම් 450ක් විය යුතු අතර, පාන් බාගයක බර අවම වශයෙන් ග්‍රෑම් 225ක් විය යුතුය.

මේ පසුබිම යටතේ සිකුරාදා (ජුලි 26) මධ්‍යම රාත්‍රියේ සිට ක්‍රියාත්මක වන පරිදි ග්‍රෑම් 450 පාන් ගෙඩියක මිල රුපියල් 10කින් අඩු කරන බව සමස්ත ලංකා බේකරි හිමියන්ගේ සංගමය පසුගියදා නිවේදනය කළේය.