ඉන්දියාවේ කේරළ ප්‍රාන්තයේ 14 හැවිරිදි පිරිමි ළමයකු නිපා වෛරසයෙන් මිය යෑමත් සමඟ සෞඛ්‍ය බලධාරීන් අනතුරු ඇඟවීමක් නිකුත් කර තිබේ.

කේරළ ප්‍රාන්ත සෞඛ්‍ය ඇමැතිවරයාට අනුව, රෝගය වැළඳීමේ වැඩි අවදානම් කාණ්ඩයට අයත් පුද්ගලයන් 60 දෙනෙකු හඳුනාගෙන ඇත.

කේරළ සෞඛ්‍ය ඇමැතිවරයා වන වීනා ජෝර්ජ් පැවසුවේ මියගිය දරුවා පන්ඩික්කාඩ් නගරයේ බවත් ඔහු සමඟ සම්බන්ධ වූවන් හුදකලා කර පරීක්ෂාවට ලක් කර ඇති බවත්ය.

පොදු ස්ථානවල මුහුණු ආවරණ පැළඳීම සහ රෝහල්ගත කරන පුද්ගලයන් බැලීමට යෑමෙන් වැළකී සිටීම වැනි ආරක්ෂක පියවර ගන්නා ලෙස සෞඛ්‍ය බලධාරීන් ප්‍රදේශයේ ජනතාවගෙන් ඉල්ලා ඇත.

නිපා වෛරස් ආසාදනය යනු ලෝක සෞඛ්‍ය සංවිධානයට (WHO) අනුව ඌරන් සහ පළතුරු වවුලන් වැනි සතුන්ගෙන් මිනිසුන්ට සම්ප්‍රේෂණය වන රෝගයක් වේ.

එය දූෂිත ආහාර හරහා සහ ආසාදිත පුද්ගලයකු සමඟ සම්බන්ධ වීමෙන් ද සම්ප්‍රේෂණය විය හැකිය.

ලෝක සෞඛ්‍ය සංවිධානය විසින් මෙම වෛරසය ප්‍රමුඛ රෝග කාරකයක් ලෙස විස්තර කර ඇත්තේ එයට වසංගතයක් ඇති කිරීමට ඇති හැකියාව නිසාය.

වෛරසය 2018 දී ප්‍රථම වරට වාර්තා වූ දා සිට කේරළ ප්‍රාන්තයේ මරණ ගණනාවක් වාර්තා විය.

14 හැවිරිදි දරුවා ඊයේ මිය ගියේ ඔහුට වෛරසය ඇති බව තහවුරු වී දිනකට පසුව බව ඉන්දීය මාධ්‍ය වාර්තා කරයි.

කේරළයේ ප්‍රදේශ ගෝලීය වශයෙන් වෛරසය සඳහා වඩාත්ම අවදානම් බව කියනු ලැබේ.

පසුගිය වසරේ රොයිටර්ස් පුවත් සේවය විසින් ප්‍රකාශයට පත් කරන ලද පරීක්ෂණයකින් හෙළි වූයේ නිවර්තන ප්‍රාන්තයක් වන කේරළය ශීඝ්‍ර නාගරීකරණය සහ ශීඝ්‍ර ගස් විනාශය හේතුවෙන් නිපා වැනි වෛරසයක් මතුවීමට සුදුසුම තත්ත්වයන් නිර්මාණය කළ බවයි.

විශේෂඥයන් පවසන්නේ වාසස්ථාන අහිමි වීම නිසා සතුන් මිනිසුන්ට සමීපව ජීවත් වීම මගින් වෛරසය සතුන්ගෙන් මිනිසුන්ට පැතිරීමට උපකාර වන බවයි.

නිපා පැතිරීම වැළැක්වීම සඳහා ක්‍රියාකාරී සැලැස්මක් නිර්මාණය කරන බව ප්‍රාන්ත රජය පසුගියදා නිවේදනය කර තිබිණි.

පසුගිය වසරේ කේරළ ප්‍රාන්තයේ බලධාරීන් විසින් රෝගීන් පස්දෙනෙකු තහවුරු කර ගැනීමත් සමග පාසල් සහ කාර්යාල වසා දැමීමට කටයුතු කළේය.