බන්ධනාගාර දෙපාර්තමේන්තුවේ සේවය කරන නිලධාරීන්ගේ ආරක්ෂාව තහවුරු කිරීමට පොලිසිය පියවර ගෙන තිබේ.

මෙවැනි ආරක්ෂාවක් ලබාදීමට පියවර ගෙන ඇත්තේ සංවිධානාත්මක අපරාධකරුවන්ගෙන් තර්ජන සහ බියවැද්දීම් සිදුවන බවට කාර්ය මණ්ඩලය විසින් පොලිසියට කළ පැමිණිලි අනුවයි.

කුප්‍රකට සංවිධානාත්මක අපරාධකරුවකු වන මානික්කුගේ නුරේෂ් සුපුන් දයාරත්න නොහොත් හීනටියන මහේෂ්ගෙන් එල්ල වූ තර්ජනයක් සම්බන්ධයෙන් බූස්ස අධිආරක්ෂිත බන්ධනාගාරයේ සහකාර බන්ධනාගාර අධිකාරිවරයකු විසින් පසුගිය සතියේ පොලිසියට පැමිණිල්ලක් සිදුකර තිබිණි.

ඔහු ඩුබායි සිට මත්ද්‍රව්‍ය ජාවාරමේ යෙදෙන කණ්ඩායමක සාමාජිකයකු බව වාර්තා වේ.

සහකාර බන්ධනාගාර අධිකාරීවරයාගේ නිවසට යතුරුපැදියකින් පැමිණි පුද්ගලයන් දෙදෙනෙකු මාර්ගයෙන් මෙම තර්ජන එල්ල වී ඇති බව බන්ධනාගාර දෙපාර්තමේන්තුවේ මාධ්‍ය ප්‍රකාශක ගාමිණී බී. දිසානායක ද සනාථ කර තිබිණි.

වාර්තා වන පරිදි එම පුද්ගලයන් දෙදෙනා හීනටියන මහේෂ් වෙත දුරකථන ඇමතුමක් ලබාදී බූස්ස බන්ධනාගාරය තුළ සිදුකරන සෝදිසි මෙහෙයුම් නවත්වන ලෙස ඔහු මාර්ගයෙන් බන්ධනාගාර අධිකාරිවරයාගේ පියාට තර්ජනය කර ඇත.

ඒ අනුව මේ සම්බන්ධයෙන් පොලිස්පතිවරයා දැනුවත් කළ පසු අවශ්‍ය ආරක්‍ෂාව ලබාදීමට පොලිස් දෙපාර්තමේන්තුව පියවර ගෙන ඇති බව බන්ධනාගාර දෙපාර්තමේන්තුවේ මාධ්‍ය ප්‍රකාශක දිසානායක සඳහන් කර තිබේ.

මෙම සිදුවීම වාර්තා වන්නේ බන්ධනාගාරයේ විශේෂ අංශයකින් දුරකථන කිහිපයක් අත්අඩංගුවට ගැනීමේ සිද්ධියකින් පසුවය.

දැනට බූස්සේ රඳවා සිටින සංවිධානාත්මක අපරාධ කල්ලි සාමාජිකයකු අත්අඩංගුවට ගැනීම සම්බන්ධයෙන් අධිකාරිවරයාගෙන් ද ප්‍රශ්න කර ඇති අතර එය බන්ධනාගාර බලධාරීන්ට එල්ල වන පීඩනය තවත් වැඩි කර ඇති බව පැවසේ.

එම ස්ථානය තුළ සිදු කෙරෙන සෝදිසි කිරීම් සහ මෙහෙයුම්වලට සම්බන්ධ බන්ධනාගාර නිලධාරීන්ගේ ආරක්ෂාව සහතික කිරීම සඳහා පුළුල් ආරක්ෂක විධිවිධාන ක්‍රියාත්මක කර ඇති බව ද මාධ්‍ය ප්‍රකාශකවරයා සඳහන් කළේය.

තර්ජන තිබේ නම් ඒ පිළිබඳ අදාළ බලධාරීන්ට දැනුම්දෙන ලෙස බන්ධනාගාර දෙපාර්තමේන්තුව සිය නිලධාරීන්ට දැනුම්දීමට ද පියවර ගෙන ඇත.