නව කම්කරු නීතිය යටතේ නිවසේ සිට වැඩ කිරීම හෝ ‘දුරස්ථ ස්ථානයක සිට වැඩ කිරීම’ යන සංකල්පය සඳහා නීතිමය ප්‍රතිපාදන සැලසීමට අදාළ කටයුතු මේ වන විට කෙටුම්පත් කරමින් පවතින බව ඊයේ පාර්ලිමේන්තුවේදී හෙළිවිය.

කම්කරු ඇමැති මනූෂ නානායක්කාර පවසන පරිදි එය දැනට පවතින නීති 13ක් ඒකාබද්ධ කරමින් සම්පාදනය කෙරෙන නව කම්කරු නීතිය යටතේ හඳුන්වා දීමට නියමිත ප්‍රධාන වෙනස්කම්වලින් එකකි.

පාර්ලිමේන්තු මන්ත්‍රී ඉරාන් වික්‍රමරත්න ඇසූ වාචික ප්‍රශ්නයකට පිළිතුරු දෙමින් කම්කරු ඇමැති මනූෂ නානායක්කාර මේ බව සඳහන් කළේය.

එලෙස ඒකාබද්ධ වී වෙනස් කෙරෙන නීති දහතුන අතරට 1935 අංක14 දරන වෘත්තීය සමිති ආඥාපනත, 1941 අංක 27 දරන වැටුප් මණ්ඩල ආඥාපනත, 1942 අංක 45 දරන කර්මාන්තශාලා ආඥාපනත, 1950 අංක 43 දරන කාර්මික ආරවුල් පනත, 1971 වසරේ අංක 45 දරන සේවය අවසන් කිරීමේ විශේෂ විධිවිධාන පනත සහ 1954 අංක 19 දරන සාප්පු සහ කාර්යාල පනත ඇතුළු පනත් ඇතුළත් වේ.

නව නීතිය යටතේ ඇති නව රෙගුලාසිවලට ඇතුළත් වන්නේ සේවකයකු අතිකාල නොමැතිව, දෙන ලද ඇති සතියක අමතර පැය ගණනක් වැඩ කරන්නේ නම් ඔහුට දින දෙකක නිවාඩුවක් හිමිවීම සහ ඔහු හෝ ඇය දින හතරකින් නියමිත පැය 45 වැඩ ආවරණය කරන්නේ නම් නිවාඩු දින තුනකට හිමිකම් ඇති සම්පීඩිත වැඩ සතියක් හඳුන්වා දීමයි.

ඊට අමතරව ගෘහ සේවක සේවිකාවන් ද කම්කරු නීති යටතට පත් වනු ඇත.