වතු කම්කරුවන්ගේ දෛනික අවම වැටුප ඉහළ නැංවීමට අදාළ ගැසට් නිවේදනය ක්‍රියාත්මක කිරීම වළක්වාලමින් ශ්‍රී ලංකා ශ්‍රේෂ්ඨාධිකරණය ඊයේ අතුරු තහනම් නියෝගයක් නිකුත් කළේය.

අවම වැටුප් වැඩිවීම අභියෝගයට ලක්කරමින් ගොනුකර තිබූ පෙත්සමක් විභාග කිරීමට අවසර ලබාදීමෙන් අනතුරුව ශ්‍රේෂ්ඨාධිකරණය මෙම අතුරු තහනම් නියෝගය නිකුත් කරනු ලැබීය.

වතු කම්කරුවන්ගේ වැටුප් වැඩිකිරීමට එරෙහිව වතු සමාගම් කිහිපයක් විසින් මෙම පෙත්සම ගොනුකර තිබිණි.

මේ වසරේ මැයි මාසයේදී වතු කම්කරුවන්ගේ දෛනික අවම වැටුප රු. 1,700 ක් බවට පත්කිරීම සඳහා විෂය භාර ඇමතිවරයා විසින් මෙම ගැසට් නිවේදනය නිකුත් කර තිබිණි.

ඒ අනුව, 2024 අප්‍රේල් 25 වැනි දින අංක 2381/35 දරන අතිවිශේෂ ගැසට් පත්‍රය කම්කරු හා විදේශ රැකියා ඇමැති මනූෂ නානායක්කාර විසින් අනුමත කරන ලද අතර, නව රෙගුලාසිය 2024 මැයි 21 දින සිට ක්‍රියාත්මක වේ.

තම කම්කරුවන්ට අලුතින් නියම කරන ලද අවම වැටුප නොගෙවන වතු සමාගම් නැවත රජයට පවරා ගන්නා බවට ද ඇමැති නානායක්කාර එම අවස්ථාවේ අනතුරු ඇඟවීය.

කෙසේවෙතත්, ලංකා වැවිලිකරුවන්ගේ සංගමය ප්‍රකාශ කර ඇත්තේ, රජය විසින් වතු කම්කරුවන් සඳහා රුපියල් 1700ක් ලෙස 70% කින් විශාල ලෙස වැඩිකිරීමට රජය ගෙන ඇති අත්තනෝමතික, අදූරදර්ශී, ඒකපාර්ශ්වික තීරණයට විරුද්ධ වන බවයි.

වතු කම්කරුවෙකුගේ දෛනික වැටුප රුපියල් 1700ක් දක්වා ඉහළ නංවන බවට ජනාධිපති රනිල් වික්‍රමසිංහ ප්‍රතිඥා ලබාදුන්නේ, පසුගිය මැයි 01වැනිදා කොටගල මහජන ක්‍රීඩාංගණයේ පැවැති ලංකා කම්කරු කොංග්‍රසයේ මැයි දින රැළිය අමතමිනි.