June 29, 2024
උතුරේ සිටින දෙමළ ධීවරයන්ගේ ජීවනෝපායට බලපෑම් එල්ල කරන ඉන්දීය ධීවරයන් නීතිවිරෝධීව මසුන් ඇල්ලීමේ ගැටලුව තමිල්නාඩු ප්‍රාන්ත රජයේ සහයෝගයෙන් තොරව ඉන්දීය මධ්‍යම රජයට පමණක් විසඳීමට නොහැකි බව ධීවර ඇමැති ඩග්ලස් දේවානන්දා පවසයි.
නීති විරෝධී මසුන් මැරීමේ නිරතව සිටි ඉන්දීය ධීවරයන් පළවා හැරීමේ මෙහෙයුමකදී ශ්‍රී ලාංකික නැවියකුගේ මරණය සිදුවීම සම්බන්ධයෙන් පවා තමිල්නාඩු ප්‍රාන්ත රජය තවමත් සිටින්නේ නිහඬව පිළිවෙතකයි.
ශ්‍රී ලංකා මුහුදු සීමාවේ නීතිවිරෝධී ලෙස මසුන් ඇල්ලීමේ නිරත වූ බවට චෝදනා එල්ල වී අත්අඩංගුවට ගත් ඉන්දීය ධීවරයන් 10 දෙනාට නාවික හමුදා නාවික සෙබළාගේ මරණය සම්බන්ධයෙන් ද චෝදනා එල්ල වී තිබේ.
ඉන්දීය ට්‍රෝලර් යාත්‍රාව අල්ලා ගැනීමට යාමේදී එහි ආක්‍රමණශීලී ක්‍රියාවන් හේතුවෙන් නාවික හමුදා විශේෂ යාත්‍රා බලඝණයේ සිටි ජ්‍යෙෂ්ඨ නාවිකයකු බරපතළ තුවාල ලබා පසුව මරණයට පත්විය.
මෙම ගැටලුව මෙරට ආර්ථිකයට සහ සමුද්‍ර පරිසර පද්ධතියට විශාල හානියක් කරමින් දශක ගණනාවක් තිස්සේ සිදුවෙමින් පවතී.
නාවිකයාගේ මරණය සම්බන්ධයෙන් අදහස් දක්වමින් දේවානන්දා ඇමැතිවරයා පවසා ඇත්තේ පවතින ප්‍රශ්නය විසඳීමට තමිල්නාඩු ප්‍රාන්ත රජය උනන්දු නොවන බවයි.
මේ සම්බන්ධයෙන් සාකච්ඡා කිරීමට නවදිල්ලි නුවරට පැමිණෙන ලෙස ඉන්දීය විදේශ කටයුතු ඇමැති ආචාර්ය එස්.ජයිශංකර් මෑතකදී මෙරට කළ සංචාරයේදී දේවානන්දා ඇමැතිවරයාට ආරාධනා කර ඇත.
ඇමැති ඩග්ලස් දේවානන්දා පවසන්නේ ඉන්දීය මධ්‍යම රජයට පමණක් මෙම ප්‍රශ්නය විසඳිය නොහැකි අතර තමන් තමිල්නාඩුව ප්‍රාන්ත රජය ද හමුවිය යුතු බවයි.
මේ ප්‍රශ්නය විසඳීමට ප්‍රාන්ත රජය සූදානම් නොමැති බවත් එසේ කිරීමට කැමැත්තක් දක්වන්නේ නම් අන්තර්ජාතික මුහුදු සීමාව හරහා ශ්‍රී ලංකා මුහුදු සීමාවට පැමිණ මසුන් ඇල්ලීමට පැමිණෙන ට්‍රෝල් යාත්‍රා හිමියන්ගේ ධීවර බලපත්‍ර අවලංගු කිරීම මගින් එය පහසුවෙන් කළ හැකි බවත් ඔහු පෙන්වා දෙයි.
බොහෝ ට්‍රෝල් යාත්‍රා හිමියන්ගෙන් තමිල්නාඩුවේ දේශපාලනයට බලපෑම් ඇති බැවින් රාජ්‍ය තාන්ත්‍රික මාර්ග හරහා මෙම ගැටලුව විසඳීම දුෂ්කර බව ඇමැතිවරයා පෙන්වාදෙයි.
යාන්ත්‍රික ඉන්දියානු බෝට්ටු සිය ගණනක් නීතිවිරෝධී මසුන් ඇල්ලීමේ නිරත වන බැවින් කුඩා ෆයිබර් බෝට්ටු ඇති මෙරට ධීවරයන් මසුන් ඇල්ලීම සඳහා මුහුදු යෑම නතර කර ඇති බවද ඔහු පැවසීය.
ඇමැතිවරයා උතුරේ අනෙකුත් දෙමළ පක්‍ෂවලට චෝදනාවක් එල්ල කළේ 13 වැනි ව්‍යවස්ථා සංශෝධනය ක්‍රියාත්මක කිරීම ගැන පමණක් කතා කරනු මිස ඔවුන් මෙම ගැටලුවට විසඳුමක් ඉදිරිපත් නොකරන බවටයි.
