රුපියල් මිලියන ගණනක මූල්‍ය වංචාවක් හේතුවෙන් අතුරුගිරිය අන්තර් හුවමාරුවේ මුදල් අයකැමිවරුන් 22 දෙනෙකුගේ සේවය අත්හිටුවා ඇති බව මාර්ග සංවර්ධන අධිකාරිය (RDA) පවසයි.

ජනමාධ්‍ය වාර්තාවලට අනුව RDA අධ්‍යක්ෂ ජනරාල් ඉංජිනේරු ප්‍රියන්ත සූරියබණ්ඩාර පවසා ඇත්තේ, මෙම මූල්‍ය වංචාව පිටත වටරවුම් අධිවේගී මාර්ගයේ පිහිටි අතුරුගිරිය අන්තර් හුවමාරුවේදී සිදුව ඇති බවයි.

ඒ අනුව අතුරුගිරිය අන්තර් හුවමාරු මධ්‍යස්ථානයේ මුදල් අයකැමියන්ගේ සේවය RDA අධ්‍යක්ෂ ජනරාල්වරයාගේ නියෝගය මත RDA නියෝජ්‍ය අධ්‍යක්ෂ ජනරාල්වරයා විසින් අත්හිටුවා ඇත.

2020 වසරේ ශ්‍රී ලංකාව මුහුණදුන් විදුලි අර්බුදය ප්‍රයෝජනයට ගනිමින් මෙම මහා පරිමාණ මූල්‍ය වංචාව මුලින් සිදුකර ඇති බව මූලික විමර්ශනවලින් හෙළි වී තිබේ.

පසුව විදුලිය විසන්ධි කර හෝ හොර රහසේ විදුලි සැපයුම් වයරය ගලවා මූල්‍ය වංචාව දිගින් දිගටම සිදුකර ඇති බව විමර්ශනවලදී අනාවරණය වේ.

CCTV කැමරා ක්‍රියාත්මක නොවන පරිදි මුදල් අයකැමියන් විදුලිය විසන්ධි කර ඇති අතර, හුවමාරුව හරහා ගමන් කරන රියදුරන්ගෙන් මුදල් ලබාගෙන ඇති බව පැවසේ.

අතුරුගිරිය අන්තර් හුවමාරු මධ්‍යස්ථානයේ සේවයේ නියුතු අයකැමිවරුන් 27 දෙනාගෙන් 22 දෙනකු එකී මූල්‍ය වංචාව සිදුකර ඇති බව අනාවරණය වී තිබේ.

මේ වසරේ ජනවාරි මස අගදී CCTV කැමරා අඛණ්ඩව ක්‍රියා විරහිත වීම හේතුවෙන් රුපියල් මිලියන 2 කට ආසන්න මූල්‍ය වංචාවක් සිදුව ඇති බව විමර්ශනවලදී අනාවරණය වී තිබේ.