June 25, 2024
යෝජිත ස්ත්‍රී පුරුෂ සමානාත්මතා පනත් කෙටුම්පත සම්බන්ධයෙන් ශ්‍රේෂ්ඨාධිකරණයේ තීරණය අධ්‍යයනය කිරීම සඳහා පාර්ලිමේන්තු තේරීම් කාරක සභාවක් පත් කරන ලෙස කාන්තා, ළමා කටයුතු සහ සමාජ සවිබල ගැන්වීම් ඇමැතිවරයා ද වන ජනාධිපති රනිල් වික්‍රමසිංහ කළ ඉල්ලීම ඉදිරි පක්ෂ නායක රැස්වීමේදී සාකච්ඡා කිරීමට නියමිතව තිබේ.
පාර්ලිමේන්තුවේදී අදහස් දක්වමින් පසුගිය සතියේ (ජුනි 18) ජනාධිපතිවරයා කථානායක මහින්ද යාපා අබේවර්ධනගෙන් ඉල්ලා සිටියේ ප්‍රශ්නගත තීන්දුව සොයා බැලීම සඳහා තේරීම් කාරක සභාවක් පත් කරන ලෙසයි.
මේ සම්බන්ධයෙන් කළ විමසීමක ප්‍රතිචාර දක්වමින් කථානායක අබේවර්ධන ප්‍රකාශ කර ඇත්තේ එය තීරණය කළ යුත්තේ පක්ෂ නායකයන් වන අතර ඉදිරි රැස්වීමේදී ඒ පිළිබඳ සාකච්ඡා කරන බවයි.
ශ්‍රේෂ්ඨාධිකරණයේ ත්‍රිපුද්ගල විනිසුරු මඩුල්ලක් විසින් ස්ත්‍රී පුරුෂ සමානාත්මතා පනත් කෙටුම්පත ආණ්ඩුක්‍රම ව්‍යවස්ථාවට පටහැනි බවත්, තුනෙන් දෙකක විශේෂ පාර්ලිමේන්තු බහුතරයකින් සහ ජනමත විචාරණයකදී ජනතාවගේ අනුමැතියකින් තොරව එය සම්මත කළ නොහැකි බවත් තීන්දු කර තිබිණි.
තීන්දුව නිකුත් කිරීමෙන් පසුව, ජනාධිපති වික්‍රමසිංහ ශ්‍රේෂ්ඨාධිකරණයේ තීන්දුවට එරෙහිව පාර්ලිමේන්තුවේදී අදහස් දැක්වීය.
එමගින් පාර්ලිමේන්තුවේ ව්‍යවස්ථාපිත බලතල උල්ලංඝනය කර ඇති බව ද ඔහු ප්‍රකාශ කළේය.
ස්ත්‍රී පුරුෂ සමානාත්මතාව පිළිබඳ ජාතික ප්‍රතිපත්ති ස්ථාපිත කිරීමේ පනත් කෙටුම්පතේ අරමුණ, පවතින අන්තර්ජාතික බැඳීම් සහ පෙර පැවති අධිකරණ අර්ථකථන සමඟ සමපාත වන බවට ඔහු තර්ක කළේය.
මේ අතර, ශ්‍රේෂ්ඨාධිකරණයේ තීරණය සම්බන්ධයෙන් ජනාධිපති වික්‍රමසිංහ පසුගියදා පාර්ලිමේන්තුවේදී කළ ප්‍රකාශයට ප්‍රතිචාර දක්වමින් ශ්‍රී ලංකා නීතීඥ සංගමය කියා සිටියේ, පනත් කෙටුම්පත රටේ ඉහළම නීතිය වන ආණ්ඩුක්‍රම ව්‍යවස්ථාවට අනුකූලද යන්න තක්සේරු කිරීමෙන් ශ්‍රේෂ්ඨාධිකරණය සිය ව්‍යවස්ථාපිත වගකීම ඉටු කර ඇති බවයි.
විවිධ මත දැරීමට පුද්ගලයන්ට අයිතියක් ඇතත්, මහජනතාවට පැවරී ඇති යුතුකම ඉටු කිරීම සම්බන්ධයෙන් ව්‍යවස්ථාදායකය හෝ විධායකය විසින් අධිකරණය විවේචනය නොකළ යුතු බව එම සංගමය අවධාරණය කරයි.
