නව තාක්ෂණික වෙනස්කම් සහිත ඩිජිටල් හැඳුනුම්පත් (ID) ව්‍යාපෘතිය සඳහා අලුතින් ටෙන්ඩර් කැඳවීමට අපේක්ෂා කරන බව තාක්ෂණ රාජ්‍ය ඇමැති කනක හේරත් පවසයි.

ඔහු ප්‍රකාශ කර ඇත්තේ පසුගිය වසරේ අසාර්ථක වීමෙන් පසු ව්‍යාපෘතිය සඳහා සංවර්ධකයකු තෝරා ගැනීමට ඉදිරි සති කිහිපය තුළ කැබිනට් අනුමැතිය ලැබීමෙන් පසු රජය තවත් ටෙන්ඩර් ක්‍රියාවලියකට යන බවයි.

පසුගිය වසරේ ඉදිරිපත් වූ ඉන්දීය සමාගම් දෙක නුසුදුස්සන් වීමෙන් පසුව තාක්ෂණික කමිටුව විසින් ව්‍යාපෘතියේ තාක්ෂණික වෙනස්කම් කිහිපයක් සිදු කර ඇති බව ඔහු සඳහන් කරයි.

නව ඩිජිටල් හැඳුනුම්පත් මුද්‍රණය කිරීම සඳහා සමාගමක් තෝරා ගැනීමේ ටෙන්ඩරයක් පසුගිය වසරේ දියත් කරන ලදී.

වැඩි කල් නොගොස්, ලංසු ඉදිරිපත් කළ ඉන්දියානු ලංසුකරුවන් දෙදෙනකු වන Madras Security Printers (MSP) සහ Protein Technologies නුසුදුස්සන් වීමෙන් පසුව, ඩිජිටල් හැඳුනුම්පත් ව්‍යාපෘතිය සඳහා ඩොලර් මිලියන ගණනක ටෙන්ඩරය නැවත ඉදිරිපත් කරන බව නිවේදනය කරන ලදී.

රාජ්‍ය ඇමැති හේරත් පැවසුවේ ව්‍යාපෘතිය සඳහා සංවර්ධකයකු තෝරා ගැනීමෙන් පසු ව්‍යාපෘතියේ පළමු අදියරේදී දත්ත රැස් කිරීමට අවශ්‍ය වේදිකාව රජය විසින් ගොඩනඟන බවයි.

වේදිකාව සකස් කළ පසු රජය විසින් වසරක කාලයක් දත්ත රැස් කිරීම සඳහා දිවයින පුරා දත්ත රැස්කිරීමේ මධ්‍යස්ථාන 800-1200ක් ස්ථාපිත කරන බව රාජ්‍ය ඇමැතිවරයා පැවසීය.

ඉන්දීය සමාගම් නුසුදුස්සන් කිරීමට පෙර ආරක්‍ෂක ගැටලු මතු වූයේ ජාතික දත්ත හෙළිදරව් වනු ඇතැයි යන ප්‍රකාශයන් පවතින බැවිනි.

ඉන්දියාව අරමුදල් සපයන ඩිජිටල් හැඳුනුම්පත් ව්‍යාපෘතිය සඳහා නුසුදුස්සන් කෙරුණු ඉන්දීය සමාගම් සම්බන්ධයෙන් ගැටලු මතුව තිබුණේ ශ්‍රී ලාංකික පුරවැසියන්ගේ දත්ත රහස්‍යතාව සහ පෞද්ගලික දත්ත ආරක්ෂා කිරීම පිළිබඳ බව රාජ්‍ය ඇමැතිවරයා පසුගිය වසරේ ප්‍රකාශ කළේය.