එක්සත් ජාතීන්ගේ මානව හිමිකම් කවුන්සිලයට ශ්‍රී ලංකාව පිළිබඳ යෝජනාවක් ඉදිරිපත් කළ මූලික කණ්ඩායම මෙරට අධිකරණයේ ස්වාධීනත්වය ආරක්ෂා කරන ලෙස ඉල්ලා තිබේ.

කැනඩාව, මලාවි, මොන්ටිනිග්‍රෝ, උතුරු මැසිඩෝනියාව, එක්සත් රාජධානිය සහ අමෙරිකා එක්සත් ජනපදයෙන් සමන්විත එම මූලික කණ්ඩායම එක්සත් ජාතීන්ගේ මානව හිමිකම් කවුන්සිලයේ 56 වැනි සැසිවාරයේදී කියා සිටියේ රටේ නීති ආයතනවල විනිවිදභාවයක් තිබිය යුතු බවයි.

එක්සත් රාජධානියේ මානව හිමිකම් තානාපති රීටා ෆ්‍රෙන්ච් විසින් මෙම ප්‍රකාශය සිදු කරන ලදී.

“මානව හිමිකම් කඩකිරීම් සම්බන්ධයෙන් දීර්ඝ කාලයක් තිස්සේ පවතින දණ්ඩමුක්තිය ඉස්මතු කරන ශ්‍රී ලංකාවේ බලහත්කාරයෙන් අතුරුදහන් කිරීම් සම්බන්ධයෙන් වගවීම පිළිබඳ ඔබගේ මෑත වාර්තාවට ස්තූතියි. බලහත්කාරයෙන් අතුරුදහන් කිරීම් නිසා ඇති වන දුක් වේදනා සහ සියලු ප්‍රජාවන්ට එහි බලපෑම විසඳීම සඳහා වන නිර්දේශ සමඟ සම්බන්ධ වන ලෙස අපි රජයෙන් ඉල්ලා සිටිමු.” යනුවෙන් ඇය ප්‍රකාශ කර ඇත.

මුලික කණ්ඩායම ප්‍රකාශ කළේ ත්‍රස්තවාදය මර්දනය කිරීම සහ අන්තර්ජාල ආරක්ෂාව සම්බන්ධ නීති ඇතුළුව ශ්‍රී ලංකාව විසින් සකස් කරන ලද සහ ක්‍රියාත්මක කරන ඕනෑම නව නීති සම්පාදනයක් මගින්ම සැමට ප්‍රකාශනයේ නිදහස ආරක්ෂා කිරීම ඇතුළු මානව හිමිකම් වගකීම් ඉටු කිරීම ඉතා වැදගත් බවයි.

“අධිකරණ ස්වාධීනත්වය සහ රටේ නීති ආයතනවල ස්වාධීනත්වය සහ විනිවිදභාවය ආරක්ෂා කිරීමේ අවශ්‍යතාව අපි අවධාරණය කරමු. යාපනයේ අධි ආරක්‍ෂිත කලාපයෙන් ඉඩම් නිදහස් කිරීම අපි සාදරයෙන් පිළිගන්නා අතරම, ශ්‍රී ලංකාවේ උතුරු සහ නැගෙනහිර ඉඩම් අත්පත් කර ගැනීම් සම්බන්ධව පවතින ආතතීන් සහ අත්තනෝමතික අත්අඩංගුවට ගැනීම්, පොලිස් මෙහෙයුම් අතරතුර රඳවා තබා ගැනීම, අක්‍රමවත් සෝදිසි කිරීම් සහ අයහපත් සැළකීම් පිළිබඳ වාර්තා පිළිබඳ අපි කණස්සල්ලට පත්ව සිටිමු.” යනුවෙන් මූලික කණ්ඩායම පැවසීය.

සංක්‍රාන්ති යුක්ති යාන්ත්‍රණයන් ස්වාධීන, සියල්ලන් ඇතුළත්, අපක්ෂපාතී, පාරදෘශ්‍ය බව සහ බලපෑමට ලක් වූ ප්‍රජාවන්ගේ අපේක්ෂාවන් සපුරාලීම සහතික කරන ලෙස ද කණ්ඩායම රජයෙන් ඉල්ලා සිටියේය.