අපනයන අරමුණු සඳහා ගංජාවලින් ඖෂධ නිපදවීම වෙනුවෙන් ගංජා වගා කිරීම සහ නිෂ්පාදනය කිරීම සඳහා උනන්දුවක් දක්වන දේශීය හා විදේශීය ආයෝජකයන්ගෙන් රජය ව්‍යාපෘති යෝජනා කැඳවා තිබේ.

ගංජාවලින් නිපදවන ඖෂධ සහ ඒ ආශ්‍රිත නිෂ්පාදන සඳහා වන ගෝලීය ඉල්ලුමට ප්‍රවේශ වීම එමගින් අරමුණු කරයි.

2024 පෙබරවාරි 6 වැනි දින කැබිනට් සම ප්‍රකාශක ඇමැති බන්දුල ගුණවර්ධන විසින් අපනයනය සඳහා ගංජා වගා කිරීම පිළිබඳ යෝජනාවක් ඇමැති මණ්ඩලයට ඉදිරිපත් කර ඇති බවට කරන ලද ප්‍රකාශ ප්‍රතික්ෂේප කිරීමෙන් පසුව මෙම පියවර අනාවරණ වේ.

මෙම ව්‍යාපෘති ශ්‍රී ලංකා ආයෝජන මණ්ඩලයේ සහ ආයුර්වේද දෙපාර්තමේන්තුවේ ඒකාබද්ධ අධීක්‍ෂණය යටතට වැටේ.

ආයෝජන මණ්ඩලය විසින් වෙන්කරන ලද කලාපයක් තුළ ව්‍යාපෘති සඳහා පහසුකම් සැලසීම සහ ක්‍රියාත්මක කරනු ලබන අතර ආයුර්වේද දෙපාර්තමේන්තුව වගාව, නිෂ්පාදනය, නියාමනය සහ බලපත්‍ර ක්‍රියාවලි කළමනාකරණය කරනු ඇත.

ආයෝජන මණ්ඩලයට අනුව, 1961 අංක 31 දරන ආයුර්වේද පනත, 1978 අංක 04 දරන ශ්‍රී ලංකා ආයෝජන මණ්ඩලයේ නීතිය සහ අනෙකුත් අදාළ නීතිවලට අනුව ව්‍යාපෘති යෝජනා ඇගයීමට ලක් කෙරේ.

සුදුසුකම් ලත් අයදුම්කරුවන් අවම වශයෙන් ඩොලර් 500,000ක ආයෝජනයක් කළ යුතුය.

අවශ්‍ය නිර්ණායක සපුරාලීමෙන් සහ ආයෝජන මණ්ඩලය වෙතින් නිර්දේශයක් ලැබීමෙන් පසු, ආයුර්වේද දෙපාර්තමේන්තුව විසින් ව්‍යාපෘති සඳහා අවශ්‍ය බලපත්‍ර නිකුත් කරනු ඇත.

ඒ සඳහා ඩොලර් 100,000ක මූලික බලපත්‍ර ගාස්තුවක් අවශ්‍ය වන අතර ඉන්පසුව ඩොලර් 200ක වාර්ෂික අලුත් කිරීමේ ගාස්තුවකට යටත් වනු ඇත.

මීට අමතරව, සුදුසුකම් ලත් අයදුම්කරුවන් ගිවිසුම අත්සන් කිරීමට පෙර ආයෝජන මණ්ඩලය වෙත ඩොලර් මිලියන 2ක ආරක්ෂක තැන්පතුවක් තැබිය යුතු අතර එය බලපත්‍රයේ වලංගු කාලය සඳහා බල පවත්වනු ලැබේ.

ව්‍යාපෘතියේ මූල්‍ය ශක්‍යතාව සහ තාක්ෂණික ශක්‍යතාව තක්සේරු කිරීම සඳහා ආයෝජන යෝජනාවලට සවිස්තරාත්මක තොරතුරු ඇතුළත් විය යුතුය.

එවැනි තොරතුරු සැපයීමට අපොහොසත් වීම නුසුදුස්සකු වීමට හේතු විය හැක.

අනාගත අයදුම්කරුවන් ආයෝජන මණ්ඩලය වෙත ආපසු නොගෙවන ඩොලර් 400 අයදුම්පත් ගාස්තුවක් සහ ආයුර්වේද දෙපාර්තමේන්තුව වෙත ඩොලර් 1,250ක ව්‍යාපෘති ඇගයීම් ගාස්තුවක් ගෙවිය යුතුය. අ

යදුම්පත් 2024 ජුනි 20ට පෙර ආයෝජන මණ්ඩලය වෙත ඉදිරිපත් කළ යුතුය.

කැබිනට් සම ප්‍රකාශක ඇමැති ගුණවර්ධන විසින් ප්‍රතික්ෂේප කිරීමෙන් පසු, 2024 පෙබරවාරි 7 වැනි දින හිටපු සංචාරක රාජ්‍ය ඇමැති ඩයනා ගමගේ තහවුරු කළේ 2023 දී ගංජා අපනයනය කිරීමට කැබිනට් මණ්ඩලය දැනටමත් අනුමැතිය ලබා දී ඇති බවයි.

‘ත්‍රෛලෝක විජය පත්‍ර (ගංජා) පදනම් කරගත් නිෂ්පාදන අපනයනය කිරීම’ පිළිබඳ ජනාධිපතිවරයා සහ ආයෝජන ප්‍රවර්ධන ඇමැතිවරයා සහ සෞඛ්‍ය ඇමැතිවරයා විසින් 2023 නොවැම්බර් 29 දිනැති ඒකාබද්ධ සංදේශයක් වන අංක 23/2321/631/031 දරන කැබිනට් පත්‍රිකාව ඇය විසින් පෙන්වා දෙන ලදී.

ඇය පැවසුවේ ජනාධිපති රනිල් වික්‍රමසිංහ, ආයෝජන ප්‍රවර්ධන රාජ්‍ය ඇමැති දිලුම් අමුණුගම සමඟ කැබිනට් පත්‍රිකාව ඉදිරිපත් කළ බවයි.