June 16, 2024
ඉන්දීය විදේශ කටයුතු ඇමැති එස්.ජයශංකර් ලබන සතියේ සිදු කිරීමට නියමිත ශ්‍රී ලංකා සංචාරයේදී ඉන්දීය ධීවරයන් සතියකට දින තුනක් ශ්‍රී ලංකාවේ උතුරු මුහුදු සීමාවට ඇතුළු වී නීතිවිරෝධී ලෙස ධීවර කටයුතු සිදුකිරීම සම්බන්ධයෙන් අවධානය යොමුකිරීමට නියමිත බව ධීවර ඇමැති ඩග්ලස් දේවානන්දා පවසයි.
මාස දෙකක දීර්ඝ වාර්ෂික ධීවර තහනම සිකුරාදා ඉවත් කිරීමෙන් පසු ඉන්දීය ධීවරයින් නැවත ශ්‍රී ලංකා මුහුදු තීරයට පැමිණෙනු ඇතැයි අපේක්ෂා කෙරේ.
ඉන්දීය අගමැති නරේන්ද්‍ර මෝදිගේ දිවුරුම් දීමේ උත්සවයට සහභාගී වීම සඳහා ජනාධිපති රනිල් වික්‍රමසිංහ පසුගිය ඉරිදා නවදිල්ලි නුවරට ගිය අවස්ථාවේදී විදේශ ඇමැති ආචාර්ය ජයිෂන්කර් සමඟ පැවති හමුවකදී මේ සම්බන්ධයෙන් කරුණු ඉදිරිපත්ව තිබේ.
‘ජාතියක් වශයෙන් අපි අපේ සම්පත්, අවශ්‍යතා සහ අපේ ධීවර ජනතාවගේ ජීවනෝපාය ආරක්ෂා කළ යුතුයි. මීළඟ කැබිනට් රැස්වීමේදීත් (ජුනි 19) මේ ප්‍රශ්නය මතු කරන්න බලාපොරොත්තු වෙනවා” යැයි ඇමැති දේවානන්දා පවසයි.
ඉන්දීය බලධාරීන් වාර්ෂික ධීවර තහනම ඉවත් කිරීමට දින කිහිපයකට පෙර, ඉන්දීය ධීවරයින් ශ්‍රී ලංකාවට පැමිණීම වැළැක්වීමට වහා පියවර ගන්නා ලෙස ඉල්ලා උතුරේ ධීවර සංගම් පිරිසක් යාපනයේ පිහිටි ඉන්දීය කොන්සල් කාර්යාලයේ නිලධාරීන්ට අඟහරුවාදා පෙත්සමක් භාරදුන්හ.
උතුරේ ධීවර සන්ධානය නමින් එකමුතුවක් පිහිටුවා ගත් ධීවර සංගම් ජනාධිපති රනිල් වික්‍රමසිංහගෙන් ඉල්ලීමක් කරයි.
සෑම සඳුදා, බදාදා සහ සෙනසුරාදා සවස් කාලයේ තමිල්නාඩු ට්‍රෝලර් යාත්‍රා දහස් ගණනක දෛනික ආක්‍රමණය නිරීක්ෂණය කිරීම සහ වැළැක්වීම සඳහා ඔවුන්ගේ උපරිම උත්සාහයන් කඩිනම් කරන ලෙස ඉන්දියානු බලධාරීන්ගෙන් ඉල්ලා සිටින පෙත්සමක් ද ඔවුන් භාර දී තිබේ.
අප්‍රේල් 14 දින සිට ක්‍රියාත්මක වූ, පසුගිය සිකුරාදා ඉවත් කරන ලද, මාස දෙකක දීර්ඝ ධීවර තහනම බලාත්මක කරනු ලබන්නේ, සාගරයේ මත්ස්‍ය සම්පත බෝ කිරීමට පහසුකම් සැලසීමට සහ තිරසාරභාවය සඳහා සාගර ප්‍රභවයන්ගේ සමතුලිතතාවය පවත්වා ගැනීමට ය.
මේ වන විට ශ්‍රී ලංකා මුහුදු සීමාවේ ධීවර කටයුතුවල නිරත වන ඉන්දීය ධීවරයින් නාවික හමුදාව සහ වෙරළාරක්ෂක බලකාය විසින් අත්අඩංගුවට ගෙන ඔවුන් සතුව ඇති ට්‍රෝලර් යාත්‍රා අත්අඩංගුවට ගැනීමෙන් පසු නීතිමය ක්‍රියාමාර්ගවලට යොමුකරනු ලැබේ.
බලපත්‍රයක් නොමැතිව මසුන් ඇල්ලීම සම්බන්ධයෙන් මහේස්ත්‍රාත් අධිකරණය විසින් මාස දහඅටක අත්හිටවූ සිරදඬුවමක් නියම කරන නීතිමය ක්‍රියාමාර්ගයෙන් පසුව, ඉන්දීය රාජ්‍යතාන්ත්‍රික දූත මණ්ඩලවල සහාය ඇතිව එම ධීවරයින් නිදහස් කර ආපසු ගෙන්වා ගනු ලැබේ.
