හෙරොයින් ළඟ තබා ගැනීම සහ ජාවාරම් කිරීම සම්බන්ධයෙන් වරදකරුවන් වූ පාකිස්ථාන සහ ඉරාන ජාතිකයන් හත් දෙනෙකුට කොළඹ මහාධිකරණය ජීවිතාන්තය දක්වා සිරදඬුවම් නියම කර තිබේ.

අදාළ නඩුව අද (14) පෙරවරුවේ අධිකරණය හමුවේ කැඳවූ අවස්ථාවේදී කොළඹ මහාධිකරණ විනිසුරු ආදිත්‍ය පටබැඳිගේ විසින් මෙම තීන්දුව ප්‍රකාශයට පත් කරන ලදී.

2022 වසරේ ශ්‍රී ලංකා නාවික හමුදාව විසින් සිදු කරන ලද මෙහෙයුමකදී වරදකරුවන් වූ පකිස්ථාන සහ ඉරාන ජාතිකයන් ශ්‍රී ලංකාවේ මුහුදු සීමාව තුළ හෙරොයින් කිලෝග්‍රෑම් 123ක් ප්‍රවාහනය කරමින් සිටියදී අත්අඩංගුවට ගෙන තිබිණි.

පසුව නීතිපතිවරයා සැකකරුවන්ට එරෙහිව කොළඹ මහාධිකරණය හමුවේ අධි චෝදනා ගොනු කළේය.

අදාළ නඩුව අද අධිකරණය හමුවේ කැඳවූ අවස්ථාවේදී විත්තිකරුවන් චෝදනාවලට වරද පිළිගෙන ඇති අතර අනතුරුව ඔවුන්ට ජීවිතාන්තය දක්වා සිරදඬුවම් නියම කර ඇත.

වරදකරුවන් වූ විදේශිකයන් කළ ඉල්ලීමක් සැළකිල්ලට ගනිමින් ඔවුන්ගේ සිරදඬුවම් නියම කිරීම සඳහා ඔවුන් අදාළ රටවලට පිටුවහල් කරන ලෙස ද අධිකරණය නියෝග කළේය.