උසස් පෙළ විභාග ප්‍රතිඵල සමාජ මාධ්‍ය ඔස්සේ ප්‍රකාශයට පත් කිරීමෙන් වළකින ලෙස විශ්වවිද්‍යාල ප්‍රතිපාදන කොමිෂන් සභාව මහජනතාවගෙන් ඉල්ලීමක් කරයි.

එම කොමිෂන් සභාවේ සභාපති මහාචාර්ය සම්පත් අමරතුංග අනතුරු ඇඟවූයේ මෙවැනි සමාජ මාධ්‍ය පළ කිරීම් සිසුන්ට විශ්වවිද්‍යාලවලට අයදුම් කිරීමේ අවස්ථාවට අහිතකර ලෙස බලපෑ හැකි බවයි.

සමාජ මාධ්‍ය ඔස්සේ හුවමාරු වන ප්‍රතිඵලවල විභාග අංකය, ජාතික හැඳුනුම්පත් අංකය වැනි සමාජ මාධ්‍යවල පළවන තොරතුරු ඕනෑම පුද්ගලයකුට භාවිත කළ හැකි බව මහාචාර්ය අමරතුංග පෙන්වා දුන්නේය.

තුන්වැනි පාර්ශ්වයකට විශ්වවිද්‍යාල ප්‍රවේශය සඳහා අයදුම් කිරීමට මෙම තොරතුරු භාවිත කළ හැකි බවත්, එමඟින් සැබෑ අයදුම්කරුට විශ්වවිද්‍යාල ප්‍රවේශය සඳහා අයදුම් කිරීම සුරක්ෂිත කර ගැනීමට ඇති අවස්ථාව අහිමි වන බවත් ඔහු වැඩිදුරටත් පැවසීය.

“එවැනි සිදුවීමක් සිදුවුවහොත්, සැබෑ අයදුම්කරුට මෙම ප්‍රවේශය ලබාගත හැක්කේ සම්පූර්ණ ක්‍රියාවලියට පිළියම් යෙදීමෙන් පසුව පමණයි, ඒ සඳහා දිගු කාලයක් ගතවෙන්න පුළුවන්,” යැයි ඔහු පැවසීය.

තම උසස් පෙළ ප්‍රතිඵල සමාජ මාධ්‍ය, විශේෂයෙන්ම ෆේස්බුක් හරහා බෙදාගැනීමේ අනතුර පිළිබඳ යළිත් අවධාරණය කළ මහාචාර්ය අමරතුංග, එසේ කිරීමෙන් වළකින ලෙස සිසුන්ගෙන් සහ ඔවුන්ගේ පවුල්වලින් ඉල්ලා සිටියේය.

2023 (2024 වසරේ පවත්වන ලද ) අ.පො.ස උසස් පෙළ විභාග ප්‍රතිඵල මැයි 31 නිකුත් විය.

විභාග දෙපාර්තමේන්තුවට අනුව, විභාග සඳහා පෙනී සිටි 269,613ක අයදුම්කරුවන් අතරින් 173,444 ක් (64.33%) විශ්වවිද්‍යාල ප්‍රවේශය සඳහා සුදුසුකම් ලබා ඇත.