වතුකරයේ කම්කරුවන්ගේ වැටුප් වැඩි කිරීමට අදාළව කම්කරු හා විදේශ රැකියා අමාත්‍යාංශයේ ලේකම් ආර්.පී.ඒ.විමලවීර විසින් පසුගිය සතියේ නිකුත් කරන ලද ගැසට් නිවේදනයට ඇමැතිවරයා අනුමැතිය ලබාදී ඇත.

2024 මැයි 21 දින සිට ක්‍රියාත්මක වන පරිදි තේ වගාව, නිෂ්පාදන වෙළෙඳාම සහ රබර් වගාව සහ අමු රබර් සැකසුම් වෙළෙඳාම යන දෙකටම මෙම වැඩිවීම අදාළ වේ.

2024 අප්‍රේල් 25 වැනි දින අංක 2381/35 දරන අති විශේෂ ගැසට් පත්‍රයේ ප්‍රකාශයට පත්කර ඇති පරිදි වැටුප් වැඩිවීම කම්කරු හා විදේශ රැකියා ඇමැතිවරයා විසින් අනුමත කර ඇත.

මෙම තීරණය 2024 මැයි 21 වැනි දින සිට බලාත්මක වනු ඇත.

පසුගිය මස 25 වැනිදා කම්කරු හා විදේශ රැකියා ඇමැති මනූෂ නානායක්කාර විසින් තේ වගා හා නිෂ්පාදන වෙළෙඳ හා රබර් වගා සහ අමු රබර් සැකසුම් වෙළෙඳාමේ කම්කරුවන්ට අවම වැටුපක් තීරණය කිරීමට කම්කරු කොමසාරිස්වරයාට අවසර ලබා දෙමින් ගැසට් නිවේදනයක් නිකුත් කර තිබිණි.

යෝජිත නව රුපියල් 1700 ජීවන වැටුප වර්තමාන ජීවන වැටුප වන රුපියල් 1000 හා සසඳන විට සියයට 70ක වැඩිවීමකි.

යෝජිත තීරණයට විරෝධතා දැක්වීමට මැයි 15 වැනි දින මධ්‍යහ්න 12.00 දක්වා අවස්ථාව දී තිබිණි.