ඉන්දීය ජාතික පිරිමි ක්‍රිකට් කණ්ඩායමේ ප්‍රධාන පුහුණුකරු පිළිබඳ කතාබහ දිනෙන් දින ඉහළ යමින් පවතී.

වත්මන් පුහුණුකරු රාහුල් ඩ්‍රාවිඩ් තවදුරටත් එම තනතුරේ කටයුතු කිරීමට අකැමැති බව ප්‍රකාශ කර ඇති බව වාර්තා වන අතර, ඉන්දීය ක්‍රිකට් පාලක මණ්ඩලය මැයි 27 වනදා අවසන් දිනය සහිතව අයැදුම්පත් කැඳවා ඇත.

එතැන් සිට, බොහෝ ඉහළ පෙළේ හිටපු ක්‍රීඩකයින්ගේ නම් යෝජනා වෙමින් පවතී.

එළැඹෙන 2024 T20 ලෝක කුසලානයෙන් පසුව ඩ්‍රාවිඩ්ගෙන් අස්වීම භාරගැනීමට ඉන්දීය ක්‍රිකට් පාලක මණ්ඩලය සූදානම් බව පැවසේ.

ඒ අනුව, හිටපු ක්‍රිකට් ක්‍රීඩකයන් වන ස්ටීවන් ෆ්ලෙමින්, ගෞතම් ගාම්භීර් සහ හර්බජාන් සිංට පසුව ශ්‍රී ලංකා ක්‍රිකට් ක්‍රීඩක මහේල ජයවර්ධනගේ නමද ප්‍රධාන පුහුණුකරු තනතුර සඳහා කතාබහට ලක්වීමට පටන්ගෙන ඇත.

කෙසේවෙතත්, මෙහේල ජයවර්ධන එම තනතුර සඳහා ඉල්ලුම් කර නොමැති බව ද පැවසේ.

ඔහු දැනට මුම්බායි ඉන්දියන්ස් කණ්ඩායම සමග කටයුතු කරයි.

ඔහුගේ පුහුණුකාරීත්වය යටතේ, මුම්බායි ඉන්දියන්ස් කණ්ඩායම 2017, 2019 සහ 2020 දී තෙවරක් IPL ජයග්‍රහණය කළේය.