May 20, 2024
සංචාරක වීසා මත සියයකට අධික පිරිසකට රුසියාවට යෑමට පහසුකම් සැලසූ පුද්ගලයකු දෙහිවල දී අත්අඩංගුවට ගෙන තිබේ.
අපරාධ පරීක්ෂණ දෙපාර්තමේන්තුවේ මිනිස් ජාවාරම් සහ සමුද්‍රීය අපරාධ විමර්ශන කොට්ඨාසය විසින් සැකකරු අත්අඩංගුවට ගෙන ඇත.
සැකකරු රුසියානු තානාපති කාර්යාලය අසල ක්‍රියාත්මක වෙමින් රුසියාවට සංචාරක වීසා ලබා ගැනීමට පුද්ගලයන්ට සහාය වී ඇති බව වාර්තා වේ.
ප්‍රශ්න කිරීම්වලින් අනතුරුව සැකකරු හෙට අධිකරණයට ඉදිරිපත් කිරීමට නියමිතය.
රුසියානු සහ යුක්‍රේන ප්‍රදේශවල ගැටුම්වලට සහභාගිවීම සඳහා ශ්‍රී ලාංකිකයන් ජාවාරම් කරන බවට වාර්තා වීමත් සමඟ මේ විමර්ශන ආරම්භ විය.
පසුගිය සති කිහිපය තුළ ශ්‍රී ලාංකිකයන් රුසියාවට සහ යුක්රේනයට ජාවාරම් කළ බව කියන සැකකරුවන් කිහිපදෙනෙකු පොලිසිය සහ අපරාධ පරීක්ෂණ දෙපාර්තමේන්තුව විසින් මීට පෙර අත්අඩංගුවට ගනු ලැබිණි.
