ශ්‍රී ලංකාව සහ ඉන්දුනීසියාව අතර වරණීය වෙළඳ ගිවිසුම පිළිබඳ වෙළඳ සාකච්ඡා කමිටුවේ දෙවැනි රැස්වීම එළඹෙන ජුනි මාසයේදී පැවැත්වීමට නියමිතය.

වෙළඳ සාකච්ඡා කමිටුවේ පළමු රැස්වීම 2024 අප්‍රේල් 03 සහ 04 යන දිනවල අන්තර්ජාලය ඔස්සේ පවත්වන ලදී.

රජයට අනුව, ඉන්දුනීසියාව සමඟ වරණීය වෙළඳ ගිවිසුමකට එළඹීම සඳහා සාකච්ඡා ආරම්භ කිරීමට 2023 ජූලි මාසයේදී කැබිනට් අනුමැතිය ලබා දෙන ලදී.

විදේශ කටයුතු රාජ්‍ය ඇමැතිවරයා සහ ඉන්දුනීසියාවේ වෙළෙඳ නියෝජ්‍ය ඇමැතිවරයා අතර අදාළ නිල සාකච්ඡා පසුගිය මාර්තු මාසයේදී පැවැත්විණි.

පළමු වෙළෙඳ කමිටු රැස්වීම අතරතුර සාකච්ඡා ක්‍රමවේදය, අදාළ දත්ත බෙදාගැනීමේ කාලසීමාව, විෂය පථය සහ ආවරණය යන ක්ෂේත්‍ර පිළිබඳ අදහස් හුවමාරු කරගෙන තිබේ.

සාකච්ඡා කමිටුවේ දෙවැනි රැස්වීම 2024 ජුනි 19 සහ 20 යන දිනවල කොළඹදී පැවැත්වීමට දෙපාර්ශ්වය එකඟ වී ඇත.

යෝජිත මනාප වෙළෙඳ ගිවිසුම සම්බන්ධයෙන් මේ වන විට ලබා ඇති ප්‍රගතිය පිළිබඳ ජනාධිපතිවරයා ඉදිරිපත් කළ කරුණු පිළිබඳ ඇමැති මණ්ඩලය දැනුවත් කර ඇත.