මීට වසර 26කට පෙර කන්තලේ භාරතීපුරම් ගම්මානයේදී දෙමළ සිවිල් වැසියන් අටදෙනෙකු ඝාතනය කිරීමේ සිද්ධියට වරදකරුවන් වූ පොලිස් නිලධාරීන් පස්දෙනෙකුට අනුරාධපුර මහාධිකරණය මරණ දඬුවම නියම කර තිබේ.

මහාධිකරණ විනිසුරු මනෝජ් තල්ගොඩපිටිය මහතා විසින් පසුගිය සිකුරාදා මෙම දඬුවම නියම කළේය.

මෙම පොලිස් නිලධාරීන් පස්දෙනා භාරතීපුරම් පොලිස් මුරපොළට අනුයුක්තව සේවය කළ අය වන අතර, මිනීමැරුමක් සිදුකිරීමේ අරමුණින් නීතිවිරෝධී ලෙස රැස්වීම සම්බන්ධයෙන් චෝදනා එල්ල වී තිබිණි.

දඬුවම් නියම වූයේ කොස්තාපල් චන්ද්‍රරත්න බණ්ඩාර, කොස්තාපල් නිමල් ප්‍රේමසිරි කෝනාර, පොලිස් පරීක්ෂක ආර්.එම්. රණරාජා බණ්ඩාර, උප පොලිස් පරීක්ෂක වයි.එල්. සෝමරත්න සහ කොස්තාපල් සෙනරත් බණ්ඩාර මැදවෙල යන පිරිසටයි.

තම පොලිස් මුරපොළට ප්‍රහාරයක් එල්ල වූ පසු ගම සෝදිසි කළ බව චූදිත පොලිස් නිලධාරීන් ප්‍රකාශ කළද පොලිස් මුරපොළට ප්‍රහාරයක් එල්ල වී නොමැති බව පරීක්ෂණවලදී අනාවරණ වී තිබේ.

1996 පෙබරවාරි 01 වැනිදා වූ සිද්ධියෙන් පසුව පොලිස් නිලධාරීන් 13 දෙනෙකුට එරෙහිව ත්‍රිකුණාමලය මහාධිකරණයේ මුලින්ම නඩුවක් ගොනු කර ඇත.

කෙසේවෙතත්, එල්.ටී.ටී.ඊ.ය සැකකරුවන් දෙදෙනෙකු අධිකරණයේ පෙනී සිටියදී ඝාතනය කිරීමෙන් පසු නඩුව අනුරාධපුර මහාධිකරණයට මාරු කරනු ලැබිණි.

පැමිණිල්ල මෙහෙයවීමෙන් අනතුරුව නියෝජ්‍ය සොලිසිටර් ජනරාල් මාධව තෙන්නකෝන් අධිකරණයෙන් ඉල්ලා සිටියේ සැකකරුවන් පස් දෙනෙකුට එරෙහි නඩුව පවත්වාගෙන යෑමට ප්‍රමාණවත් සාක්ෂි නොමැති බැවින් ඔවුන්ව නිදොස්කොට නිදහස් කරන ලෙසයි.

පසුව තවත් සැකකරුවන් දෙදෙනෙකු නිදොස්කොට නිදහස් කෙරිණි.

ඉතිරි සැකකරුවන්ට චෝදනා 37ක් එල්ල විය.

රජයේ රස පරීක්ෂක වාර්තාව ඉදිරිපත් කිරීම ප්‍රමාදවීම ඇතුළු බොහෝ හේතු නිසා තීන්දුව ප්‍රමාද වී තිබිණි .

එම වාර්තාව අධිකරණයට ලැබී ඇත්තේ 2022 දීය.

පැමිණිල්ල මෙහෙයවූයේ නියෝජ්‍ය සොලිසිටර් ජනරාල් මාධව තෙන්නකෝන් වන අතර විත්තිකරු වෙනුවෙන් නීතිඥ ලාල් කුලරත්න සහ චාන්දනී හමංගල පෙනී සිටියහ.