ශ්‍රී ලංකාවේ තලෙයිමන්නාරමේ සිට රාමේෂ්වරම්හි ධනුෂ්කොඩි දූපතට පිහිනමින් සිටි 78 හැවිරිදි පුද්ගලයකු හෘදයාබාධයකින් මියගොස් තිබේ.

ගෝපාල් රාඕ නමැති මොහු කර්නාටක ප්‍රාන්තයේ බෙංගාලෝර්හි පදිංචිකරුවෙකි.

රාඕ ශ්‍රී ලංකාවේ සිට පෝක් සමුද්‍ර සන්ධිය හරහා ඉන්දියාවට පිහිනා යෑම සඳහා පැවැත්වූ සහය පිහිනුම් ඉසව්වේ පිහිනුම් ක්‍රීඩකයන් 31 දෙනාගෙන් යුතු කණ්ඩායමේ සාමාජිකයෙකි.

පිහිනුම් ක්‍රීඩකයන් රාමේෂ්වරම් සිට බෝට්ටුවකින් පිටත්ව අප්‍රේල් 22 වැනි දින ශ්‍රී ලංකාවට පැමිණ තිබේ.

අද (අප්‍රේල් 23) අලුයම 12.10ට ඔවුන් ශ්‍රී ලංකාවේ තලෙයිමන්නාරමේ සිට ධනුෂ්කොඩි දෙසට පිහිනීමට පටන්ගෙන ඇත.

කණ්ඩායමේ තෙවැනි පිහිනුම් ක්‍රීඩකයා ලෙස සිට ඇති ගෝපාල් රාඕට නොසන්සුන් බවක් දැනෙන්නට පටන් ගෙන ඇති අතර පාන්දර 3.10ට පමණ පපුවේ වේදනාව ගැන ඔහු පැමිණිලි කර තිබේ.

ඔහුට පිහිනන්නන් සමඟ පැමිණි බෝට්ටුවට නැඟීමට වහාම උදව් කර ඇතත් ඔහුව පරීක්ෂා කළ වෛද්‍යවරයා පසුව ඔහු මියගොස් ඇති බව ප්‍රකාශ කර ඇත.

ඔහුට ගෞරවයක් වශයෙන් අනෙකුත් සියලුම පිහිනුම් ක්‍රීඩකයන් සහය දිවීමේ ඉසව්ව අවලංගු කර බෝට්ටුවකින් ධනුෂ්කොඩි දූපතට ළඟා වී තිබිණි.

මෘත ශරීරය පශ්චාත් මරණ පරීක්ෂණය සඳහා රාමේෂ්වරම් රජයේ රෝහල වෙත යවා ඇත.

මේ සම්බන්ධයෙන් රාමේෂ්වරම් නගර පොලිසිය නඩුවක් ගොනු කර ඇත.

පිහිනුම් ක්‍රීඩකයන් පිරිස ඉන්දීය සහ ශ්‍රී ලංකා රජයන් දෙකෙන්ම මේ සඳහා අවශ්‍ය සියලුම අවසර ලබාගෙන තිබූ බවද පැවසේ.